USA ka Filipino-American national nga kanhi sakop sa US Marines gironda sa Criminal Investigation and Detection Group (CIDG) Bohol sa kasong paghupot og illegal drugs ug mga armas nga walay lisensya a iyang balay sa dakbayan sa Tagbilaran.
Ang nadakpan giila nga si John Renan Rejas, 40, taga Purok 8, Barangay Poblacion sa Tagbilaran, Bohol.
Ang CIDG Bohol armado og search warrant nga giluwatan ni Judge Leo Moises Leyson sa RTC Branch 3 batok ni Rejas nunot sa nadawat nga impormasyon bahin sa illegal nga kalihokan sa suspek.
Matod ni Police Colonel Ireneo Dalogdog, regional chief sa CIDG 7, nabutang sa drug watchlist sa Philippine Drug Enforcement Agency (PDEA) 7 ang suspek ug nalakip siya sa top 5 high value individual sa ilegal nga druga sa rehiyon.
Nakuha sa mga operatiba atol sa pag-serve sa search warrant ang 19 ka putos sa gituohang shabu nga motimbang ang tanan sa 15 gramos nga gibanabana nga mokantidad kinig P150,000.
Nasakmit usab nila ang usa ka 22 rifle nga adunay scope ug silencer niini uban sa mga bala.
Dugang ni Dalogdog nga sigun sa ilang nakuha nga kasayuran nga taudtaod na nga nalambigit sa illegal nga kalihukan ang suspek.
Niretiro sa pagkasundalo sa America si Rejas niadtong 2018 human makaserbisyo sulod sa siyam ka tuig ug nipuyo sa Bohol uabn sa pamilya.
Gipasaka na ang kasong kalapasan sa Republic Act (RA) 9165 o illegal drugs ug RA 10591 labot sa armas nga nakuha gikan kaniya. (AYB)