GIPASAKAAN na og mga kaso ang mga dinakpan sa Calinan Police Station nga nagdala og daghang mga pusil ug nakuhaan og gidiling druga sa Task Force checkpoint sa Barangay Lacson, Davao City sa nakalabay nga semana.
Sumala ni Police Major Jake Goles nga expired ang License to Own and Posses Firearm (LTOPF) sa Security Agency hinungdang ila kining pasakaan og kaso kagahapong adlawa, Oktubre 5, 2021.
Pakyas nga makuha sa Dephian Security Agency ang 61 ka mga armas nga nakumpiska sa Task Force Davao ug Calinan Police Station Checkpoint niadtong Septyembre 25, 2021 alas 10 sa buntag.
Dugang ni Goles nga duha ka mga kaso ang ilang ipasaka, ang Republic Act 10591 Illegal Possession of Firearms and Ammunition ug ang RA 5487 Private Security Act human nasayran nga gi-revoke sab ang license and Certificate sa maong ahensiya.
Samtang una nang napasakaan og kasong RA 9165 o Comprehensive Dangerous Drugs Act of 2002 ug RA 10591 sila's Michael John Lantoria, 40 anyos, taga Cagayan de Oro City ug Sebastian Quiblat, 61-anyos, taga Misamis Oriental human nakuhaan og mga pakite sa gituohang shabu ug armas. (Jeepy P. Compio)