GIDAWAT ni incumbent First District Representative Paolo Duterte nga moatbang kaniya ang usa ka negusyante kinsa magpapili sa samang posisyon sa taliabot nga eleksiyon sa Mayo 2022.
Si Jamal Ranon Kanan miduso sa iyang certificate of candidacy (COC) sa pagka-kongresista sa unang distrito sa siyudad sa Davao niadtong Lunes, Oktubre 4.
Subay sa iyang profile, si Kanan maoy chief executive officer sa manpower agency.
Gisulti ni Kanan sa tigbalita nga moduso siya og mga balaod nga mohatag og trabaho.
"Line of business ko is work. Kung may batas akong [ifa-file], unang-una sa trabaho, then sa training. 'Yan ang importante kasi kung trabaho, walang training tsaka education, wala rin," tug-an niya sa tigbalita atol sa iyang pagduso sa COC sa buhatan sa Commission on Elections-Davao City sa Magsaysay Park.
Sulti sab niya nga andam siyang makig-debate batok sa Presidential son.
Sa kampo ni Duterte, sa usa ka pamahayag niadtong Lunes sa hapon, nagkanayon nga "election gives the people the power to choose their leaders."
"This is a democratic exercise," matud niya sa text message.
Matud sa kampo sa magbabalaod nga di kini maoy unang higayon nga ang kongresista dunay miatbang sa eleksiyon. Niadtong 2019 eleksiyon, duha pa ka laing kandidato midagan sab sa posisyon sa 1st district congressional nga mao si Susan Uyanguren ug Rex Labis. Apan si Duterte maoy midaug.
Sayo niini, ang COC ni Duterte giduso sa manghod niyang igsuon, Vice Mayor Sebastian Duterte, tungod kay ang kongresista nagpaayo pa sa Covid-19 sa ospital.
Si Duterte sab nagserbi isip vice mayor sulod sa duha ka termino gikan 2013 hangtud nga miluwat niadtong Disyembre 25, 2017. Matud niya ang maong lakang gihimo isip "delicadeza" human ang iyang away tali sa iyang anak babaye.