Pagtipi sa kapitan gisusi

GITUOHANG bangi sa yuta ang hinungdan sa pagpatay sa barangay kapitan sa Datu Salumay, Marilog District, Davao City niadtong Sabado sa gabii, Oktubre 2.

Sa report gikan sa Marilog Police Station, nasayran nga nagtulog lamang sud sa tindahan si Kapitan Amado Mansamo Mansabid, 55-anyos, usa ka Matigsalog tribe.

Kalit lamang miabot ang mamumuno dayon gisulod sa tindahan ang biktima ug gipusil sa makadaghang higayon tumong sa nagkadaiyang parte sa kalawasan nga maoy hinungdan sa iyang kamatayon.

Sumala sa Marilog Police, personal nga bangi ang ilang gitan-aw karon nga anggulo diha sa ilang imbestigasyon sanglit chairman sa Council of Elders sa Matigsalog tribe ang biktima ug naggunit kini og daghang mga kaso sa bangi sa yuta sa ilang dapit.

Usa ka lawom nga imbestigasyon karon ang gihimo sa Marilog PNP aron mailhan ang mamumuno.

Sa kasamtangan, gihaya na ang patay’ng lawas sa biktima sa iyang mga ka tribo ug pamilya.