Mga duwa (Miyerkules)
Oktubre 06, 2021
3:00 pm. TNT vs. SMB
6:00 pm. Magnolia vs. Meralco
Bisan og wala ang usa sa ilang sinaligan nga si Kelly Williams, apan natuman ra gihapon ang tinguha sa TNT Tropang Giga human nakaipsot sila sa higanting San Miguel Beer, 89-88, sa Game One sa PBA All-Filipino conference semifinal series, Dominggo, Octobre 3, 2021.
Apan sayod mismo si TNT coach Chot Reyes nga malahi ang dagan niini sa Game 2 sa Miyerkules, Oktubre 6, sa DHVSU Gym, Bacolor, Pampanga.
Sugdan ang duwa sa alas 3 sa hapon.
Sa pagpalta ni Williams gipamatuod sa Tropang Giga kon nganong top seed sila sa elimination round pinaagi sa panagkumboya nila ni Poy Erram ug Troy Rosario sa ilawom nga bahin nga igo na nga nakatugbang sa higanting Sugboanon nga si June Mar Fajardo.
Ang presensiya sa ilang big men nakabenepisyo sa opensa nila ni RR Pogoy ug Jayson Castro kinsa mitali og 23 ug 16 puntos nga pasunod.
Giangkon ni Reyes nga lisod ang pagpakgang ni Fajardo ilabi na kay wala si Williams nga dako unta og ikatabang.
“It was a hell of an effort by the bigs without our starting big man to just stay with June Mar Fajardo. No one can stop June Mar. What we can do is stay with him and continue to do our best and see what happens,” pasabot ni Reyes.
Sa maong duwa, ang San Miguel gibiyaan og 12 puntos, apan nakasikit kini sa fourth quarter butang nga maoy usa sa gikabalak-an ni Reyes.
Gilangkuban sa mga dekalibri ug beteranong magduduwa sa lega, ang Beermen, mipakita sa ilang kapabilidad apan nahutdan na lang kini sa oras.
Modugang og kaikag sa maong adlaw mao ang pagsuway sa Magnolia Hotshots sa pagkutlo sa ilang ikaduhang daog batok sa Meralco Bolts.
Sa Game One sikit ang duwa tali sa duh ka koponan, apan sa naghinapos nga bahin, milutaw ang dominasyon sa Hotshots nga gipangulohan nila ni Ian Sangalang, Paul Lee ug Calvin Abueva kinsa maoy nahimong Player of the Week sa PBA Press Corp sa niaging semana.
Ang pagpangita og epektibong solusyon kon unsaon pagpakgang ning trayanggulo sa Hotshots maoy dakong misyon ni Meralco coach Norman Black kinsa mosandig sa liderato sa beteranong Reynel Hugnatan nga makig-ayuda sa mga batan-on nga sila si Anjo Caram, Mac Belo ug Bong Quinto. (JBM)