NAPASAR na sa ikatulo ug pinal nga pagbasa ang ordinansa nga maghatag og cash incentive sa mga Persons With Disability (PWD) sa Dakbayan sa Ormoc.
Matod sa ordinansa, ang matag PWD sa dakbayan makadawat og tag P500 nga birthday gift ug laing P500 nga year-end incentive.
Giklaro ni Konsehal Jasper Lucero nga kadto lang mga totally disabled person ang makadawat.
"Ang kadto lang totally disabled ang makadawat, pero kadtong partially dili siya apil. Ako partially PWD man ko kay di man ko makaklaro kung wala'y eyeglasses, wala ko'y labot ana," matod ni Lucero.
Matod ni Lucero nga kadto lang sab mga registered PWD ang makadawat sa maong cash incentive. Bisan og kabus ug adunahan makadawat sa maong incentive.
"Gipangutana bitaw ko nga di raba daw gamay ra ang incentive, kadto raba indigent ang tagaan? Ako ingon, madatu ug pobre atong tagaan. It's not about the money man gud, it's all about recognition.
Gi-recognize nato atong mga igsuon nga PWD nga they are part of the community and we have to take care of our people, that is the message behind the ordinance" matod ni Lucero.
Si Felicidad Camay, usa ka PWD, dako ang pasalamat tungod kay natuman na ang ilang gipangandoy nga birthday incentive.
"Pasalamat mi kay natuman na gyod ang dugay na namo gipangandoy nga naa sab mi birthday gift unya wa gyod madugay ang pagpasar sa ordinansa" matod ni Camay.
Nagpasalamat naman si Lucero kang Mayor Richard Gomez, Congresswoman Lucy Torres-Gomez ug kauban sa Ormoc Development Team nga nangusog sab para mahatagan og pagtagad ang mga PWD.
"Usa ni sa paningkamot sa Ormoc Development Team, tungod aning atong grupo pinangulohan ni mayor nga visionary and equally visionary sab iya mga kauban sanglit nakahimo ta og ordinansa sama ani," matod ni Lucero.
Gihuwat nalang karon ang Implementing Rules and Regulation (IRR) sa maong ordinansa ug sa sunod tuig sugdan na ang pag-implementar niini.
Sa pagkakaron, ang Dakbayan sa Ormoc aduna nay 3,049 nga registered PWD. (JKDP)