PILA na lang ka buwan manamilit na si Presidente Rodrigo Duterte sa katungdanan. Sa iyang kampanya, iyang gisaad nga sulbaron ang duha ka dagkong mga suliran sa nasod: drugas ug kurapsyon. Ang drugas sulod sa unom ka mga buwan.

Human molabay ang unom ka mga buwan, nangayo siya og extension ug laing extension. Hangtod nga siya niangkon nga nakaamgo siya sa kalawom sa gamot sa illegal drugas nga bisan gani ang organisasyon sa Philippine National Police (PNP) nasudlan na. Mga lima ka police generals ang iyang ginganlan sa drug matrix.

Makapasigarbo hinuon ang iyang administrasyon nga maoy dunay labing dako nga drug haul ug nakahipos og labing daghan sa drug lords. Nakapapriso og labing daghan sa drug pushers nga niabot sa punto nga naghuot ang mga bilanggoan sa tibuok nasod.

Tingali, mao sab ang dunay pinakalapad nga drug rehabilitation. Apan nawagtang ba ang illegal drugs? Wala. Naa gihapoy kinilo nga makuha sa mga anti drug operation. Sa miaging buwan, bilyunes nga balor sa shabu ang nasakmit sa mga awtoridad sa managlahing operations sa Luzon. Timaan nga diay bisan sa daghan ug dagkong mga anti-drug operation, nagpabilin ang daghang illegal drugs.

Nagpabilin gihapon ang illegal drug operation, nga mismo gipadagan sa mga durugista nga nangabilanggo. Gipadagan ang negusyo samtang naa sila sulod sa mga selda. Kasagaran sa drug pushers nga nadakpan, nangtudlo sa tag-iya sa illegal drugs nga naa sa mga bilanggoan.

Giunsa kaha nila paghimo ni? Di sila makalihok kon way kunsabo sa sulod. Dinhi, posibleng dunay kurakot nga jail officers. Makapaduda tungod kay di transparent ang Bureau of Jail Management and Penology (BJMP) kon unsay ilang gibuhat sa mga binilanggo nga gitumbok sa mga durugista. Ngano kaha? Hilom kaayo sila. Way mabasa nga balita kalabot sa ilang gihimong aksyon.

Sa kurapsyon, nisaad ang Presidente nga iyang sumpuon kini sulod sa iyang administrasyon. Apan nagpadayon gihapon ang kurapsyon. Duna na gani nitumaw nga mga alegasyon sa Pharmally nga maoy nahatagan sa kontrata sa gipamalit nga face shields sa kagamhanan sa miaging tuig. Wa pa hinuon napamatud-an nga dunay nakapangurakot, mga pagduda pa lang.

Apan sa miaging tuig, nabisto ang kurapsyon sulod sa Philhealth gamit ang Covid-19. Naduhig gud ang pipila ka mga ospital dinhi sa Sugbo nga gipasakaan na og kaso sa National Bureau of Investigation (NBI) 7.

Klaro kaayo nga si Duterte nipakagamay sa problema sa illegal drugs ug kurapsyon. Diha na siya nakaamgo nga ang duha ka mga problema managsuon, nakagamot na.