BATA nga babaye nga 9 anyos nipasangil nga siya gilugos sa iyang 13 anyos nga silingan alas 7 sa buntag Lunes, Oktubre 4, 2021, sa Brgy. Baye, Lungsod sa Asturias, Sugbo.
Si Major Gilfred Baroman, hepe sa Asturias Police Station nga nahinabi sa Superbalita Cebu, nagkanayon nga ang 9 anyos nitug-an sa iyang ginikanan human sa nahitabo.
Si Mercy (di tinuod nga ngan), nibutyag nga samtang didto siya sa alad sa baboy sayo sa buntag, giduol siya ni Bonbon (di tinuod nga ngan) ug gideretso sa paghubo ang iyang sapot dayon siya gilugos.
Wala siya makasukol kang Bonbon kay nahadlok siya niadtong higayuna.
Human sa paglugos, si Mercy nitug-an sa iyang mga ginikanan hinungdan nga nasikop si Bonbon sa mga pulis.
Si Bonbon gi-turn over na sa kapulisan sa Asturias sa buhatan sa Department of Social Welfare and Development (DSWD) sa Asturias.
Samtang si Mercy ila nang gipadala ug gipahiling sa Pink Room sa Vicente Sotto Memorial Medical Center (VSMMC).
Ilang paaboton ang resulta sa eksaminasyon sa bata.
Human niini, ilang i-forward sa DSWD ang kaso, apan ubos sa balaud sa Pilipinas, ang 13 anyos wa pay tulubagon nga kriminal. Ang 15 anyos pataas duna nay criminal liability kon mamatud-an nga ilang natimbang pag-ayo ang tanan una pa sila nakabuhat sa krimen.
Gisuwayan na unta pagpaubos ang edad sa mga bata nga dunay tulubagong kriminal ngadto sa 9 anyos apan daghan ang ningsupak.
Sa pagkakaron, pending ang balaudnon alang sa pagpaubos sa edad sa criminally liable ngadto sa 12 anyos.