MOABOT sa 12 ka mga tunghaan sa Probinsya sa Sugbo ang nalakip sa 59 ka mga tunghaan nga mipasar sa assessment sa Department of Health (DOH) alang sa pilot implementation sa face-to-face classes.
Ang pilot test ipahigayon sa Nobiyembre 15, 2021 hangtod sa Enero 31, 2022.
Sa Lalawigan sa Sugbo, nag-una sa labing daghan ang Dakbayan sa Bogo nga may lima ka mga tunghaan nga apil sa pilot test.
Kini gilangkuban sa Combado Elementary School, Siocon Elementary School, Odlot National High School, Don Potenciano Catarata National High School, ug Bartolome Pianar National High School.
Samtang buksan usab alang sa pilot testing ang mga tunghaan sa Busay National High School (Moalboal); Basak Elementary School (Samboan); Mahanlud Elementary School (Malabuyoc); Cabagdalan Elementary School (Balamban); Luyongbaybay Elementary School (Bantayan); Cañang-Marcelo Luna National High School (Oslob); ug Pilar National High School (Pilar, Camotes).
Matod sa Department of Education (DepEd) nga madugangan pa ang maong listahan subay sa 120 ka mga tunghaan nga ilang target sa pagbukas taliwa ning pandemya.
Apan si Dr. Marilyn Andales, schools division superintendent sa Cebu Province, nagkanayon nga kinahanglan nilang susihon pa og usab ang upat ka mga tunghaan sa Balamban, Malabuyoc, Moalboal ug Oslob tungod kay duna pa kini’y kinahanglan nga i-comply.
“I’ll be working pa sa atoang LGU sa upat nga napuno, kay kaning tulo okay naman ang atong LGU sa ilang support. So kaning upat,” matod ni Andales.
Aron ma aprubahan alang sa limited face-to-face classes, kinahanglan nga nahimutang sa low-risk ang area, dunay resolution gikan sa Parent-Teachers Association (PTA), resolution sa local government officials, joint memorandum sa Department of Health (DOH) ug DepEd.
Gawas niini, una nang mipahibaw ang DepEd nga ipatuman gihapon ang mga health protocol sa mga tunghaan aron pagsiguro nga luwas kini sa pagtakboy sa Covid-19.(ANV)