MAAYONG adlaw mga Super Suki.
Mapaniiron ang katawhan karon nga nagatan-aw sa matag lakang sa mga politiko alang sa umaabot nga eleksiyon sa 2022.
Duna nay mga naka-file sa ilang certificate of candidacy alang sa national position pagka-presidente. Nahigmata ang katawhan sukad sa pag-apil ni President Rodrigo Duterte nga dili pa diay sirado ang tanan human sa filing sa certificate of candidacy hangtud makompleto tanan nga gitakda nga panahon diin puwede na himuon ang selebrasyon.
Ang pamaagi giunsa pagkasulod ni Mayor Digong nga nahimong pinal nga kandidato sa PDP-Laban niadtong 2016 presidential election, nag-abli sa pultahan diin misulod ang uban ug posible nga lain nga mga estratihiya ang mahitabo sa matag kampo aron basahon ang lihok sa kaatbang.
Dunay nagalantaw nga ang mga naka-file na karon, posible nga moatras aron matuman ang ilang pangandoy nga mopadagan og nahiusahan nga kandidato aron lumpagon ang gahum sa administrasyon ubos sa 1Sambayan.
Ang puwersa sa Solid North ug Solid South, maoy ginatan-aw nga kusog nga panag-uban kay dunay pundo nga mga botante nga masaligan sa adlaw sa piniliay.
Si Mayor Sara Duterte-Carpio nga gisinggit sa katawhan nga Run, Sara, Run, mi-file na sa inyang kandidatura, magpasubli pagka-Mayor sa dakbayan sa Davao.
Si kanhi Senador Ferdinand "Bong Bong" Marcos Jr. namahayag nga magpapili pagka-presidente, apan kagahapon lang naka-file sa iyang kandidatura.
Hinuon sa daghang higayon siya namahayag nga abli ang iyang kampo nga makighiusa ug andam siya mag-bise presidente kon modagan si Mayor Sara.
Ginatandi sa mga mamatngunon nga katawhan nga daw dula sa chess ang umaabot nga eleksiyon diin pulos pang-abli nga duso pa lang ang nahitabo sa mga banggiitan nga magdudula ug nagsugod pag-aninaw unsay posible nga piyesa ang sunod nga iduso sa kaatbang.
Pabilin nga malaumon ang katawhan nga sa katapusang yugto, Duterte-Carpio ug BBM gihapon ang mag-uban ug ang han-ay makita naman nga modagan gyud si Mayor Sara.
Ang pangutana sa katawhan kon lokal lang ang daganan ni Mayor Sara, asa mo nakakita og Mayor nga dunay gitudlo nga tigpamaba, spokesperson sa tibuok nasud?
Kon dunay isyu pang kinatibuk-an bahin kang Mayor Sara, si Liloan Mayor Christine Garcia Frasco maoy abtik nga nagatubag isip gisangunan nga tigpamaba sa Mayor.
Duna bay punto nga inyong nakita?
Usa pa lang ang tataw nga mahitabo sa umaabot nga eleksiyon. Dili na maapil sa balota nga pilian sa katawhan ang pangalan ni Atty. Elly Velez Lao Pamatong sa mga kandidato pagka-presidente kay nipanaw na siya.
Sa pagkakutaw sa dagan sa politika sa nasud, daghan gihapon ang malaumon nga politika gihapon ang sulbad sa problema sa atong nasud. Ang mga tanghaga nga nagpahipi, masulbad ra sa tukma nga panahon.