MIHANGYO ang Cotabato District Jail sa Barangay Amas, Kidapawan City ngadto sa Integrated Provincial Health Office (Ipho)-Cotabato nga mabakunahan na ang mga persons deprived of liberty (PDL).
Nasayran nga sa tibuok Soccsksargen, ang mga PDL lang sa Cotabato District Jail ang wala pa mabakunahi batok sa coronavirus disease 2019 (Covid-19).
Matud ni Jail Warden Chief Inspector Joe Anthony Gargarita nga una na silang nakig-istorya ngadto sa Department of Health-Soccsksargen ug Ipho apan ang tubag sa maong mga buhatan wala pa silay alokasyon alang sa PDL.
Giingong usa na ka PDL ang nagpositibo sa District Jail sa rapid test ug gibalhin siya sa laing kulongan aron dili makapanakod sa ubang priso.
Sa pagkakaron, gihugtan sa prisohan ang paghatag og pagkaon sa mga inmate, lakip na pagbisita nga dili moagi sa disinfection.
Samtang sa mga personahe sa Bureau of Jail Management and Penology (BJMP), dunay 21-ka adlaw nga duty scheme nga gisunod ug gidili ang paggawas sulod sab sa maong panahon samtang "on duty".
Kini kabahin sa gipatuman nga Covid-19 measures ilabi na sa mga high risk nga mga priso kung ugaling mokatag ang sakit.
Mihangyo si Gargarita nga unta gahinan sila og bakuna alang sa mga priso batok sa makatakod nga sakit. (Edgar E. Fuerzas)