SECURITY guard nga nanghulga sa iyang kanhi uyab nga ipakatap ang ilang hubo nga hulagway kon di makig jerjer kaniya nasikop sa joint entrapment operation sa Regional Anti Cyber Crime Unit (RACU) 7 ug Moalboal Police Station alas 5:00 sa hapon sa Miyerkulis , Oktubre 6, 2021 sulod sa usa ka convenience store sa Brgy. East Poblacion, lungsud sa Moalboal, Sugbo.

Si Rodel Macahilos Cuevas, 24, security guard, lumad nga taga Jimalalud, Negros Oriental, gireklamo sa iyang kanhi uyab nga 21 anyos.

Si Police Senior Master Sgt. Stewart Bayang sa Moalboal Police Station nga nahinabi sa Superbalita Cebu nagkanayon nga gihadlok ni Cuevas ang dalaga nga ipakatap niya sa social media ilang mga hubo nga hulagway ug kumbate sa katre kon dili makigkita kaniya.

Matod sa dalaga nga nisulti si Cuevas nga gimingaw na siya sa ilang panagtagay sa lawasnong kalipay ibabaw sa katre.

Wa masayod si Cuevas nga nidangop siya sa kapulisan aron magpatabang. (GPL)