NIINING paglugak na usab sa quarantine classifications sa Sugbo, hinay-hinay na sa pagpangabli ug paglagsik sa turismo ug mga patigayon.
Laing bag-ong atraksiyon ang mahimong adtuon nga anaa mahimutang sa bukirang bahin sa Lungsod sa Consolacion—ang Panoypoy Heights.
Tinuod nga makahupay sa paminaw ang pagbisita sa maong dapit diin makita ang naghikyad nga urban skyline sa Metro Cebu.
Ang Panoypoy Heights usa ka kan-anan diin dili lang makahupay sa kagutom kay makita usab nimo ang makabibihag nga skyline sa Metro Cebu ug mga kasilinganang lugar.
NAA RA SA LACION
Nahimutang kini sa bungtod nga bahin sa Barangay Panoypoy, Lungsod sa Consolacion.
Samtang imong gitamgamtam ang kalami sa ilang mga pagkaon ug makatagbaw nga mga ilimnon, makita nimo ang mga tag-as nga mga edipisyo sa dakbayan sa Sugbo, Mandaue ug Lapu-Lapu.
Super lami sab ang mga pagkaon nila nga dili sakit sa bulsa.
Miduyog ang panahon ang akong pagsuroy sa maong dapit kay padulong na usab ang pagsawop sa adlaw.
Haom aron maka-relax ug makapahuway tungod sab sa haruhay nga palibot dala sa bugnaw nga huyuhoy sa hangin diin ang area gilibutan sa mga kahoy ug mga kawayan.
Sa Panoypoy Heights makita ang matahum nga talan-awon ilabi na ang lapad nga wanang sa Cebu.
Ideal ang maong lugar aron nga makapalayo sa kasaba ug kasamok sa siyudad sa inyong pagpangaon, pagrelax ug paglingaw sa kaugalingon o ba kaha uban ang mga sakop sa pamilya.
MASINATE
Atol sa akong pagduaw sa Panoypoy nagpadulong nga mosawop ang haring adlaw nga alang nako mas monindot ang ang palibot.
Ang bugnaw nga hangin motayhop sa mga dumuduong sa Panoypoy Heights.
Sa nga pagtak-op sa adlaw, makita ang kahayag sa mga sugang dagitabnon gikan sa mga building sa siyudad.
Mopatim-aw usab ang daghang bitu-on ug makatayming makita ang kahayag sa buwan.
Adunay lamian ug mga baratong pagkaon sa Panoypoy Heights.
Adunay pamg sila mga meryenda ug uban pang mga pagkaon sama sa sisig, fishballs ug buffalo wings naa sab silay gitanyag nga frappe, coffee ug milktea.
OPERASYON
Ang Panoypoy Heights bukas gikan sa 3:00 sa hapon ngadto na sa 10:00 sa gabii sa adlawng Miyerkules hangtod adlawng Sabado, moabli sa 1:00 sa hapon sa adlawang Domingo.
UNSAON PAG-ADTO?
Ang maong establisemento nahimutang sa Panoypoy, Lungsod sa Consolacion, Northern Cebu nga gibana-bana usa ngadto sa kapin sa oras nga biyahe kon manukad sa Dakbayan sa Sugbo.
Sa kadtong manakay og PUJ nga maggikan sa SM City Cebu, sakay sa PUJ nagrota og Consolacion.
Kung gikan ka sa lugar sa Talamban / Pit-os adunay PUJ usab mga dyip nga moadto sa Consolacion og kanaog sa Fooda Consolacion ug sakay og habal-habal paingon sa Panoypoy Heights.
Sa kadtong adunay pribadong kasakyan pag-navigate gamit ang Waze o Google Maps paingon sa maong lokasyon diin ang landmark mao ang San Narciso Parish, Consolacion.
Alang sa dugang kasayuran du-awa ang Panoypoy Heights Cebu Facebook page. /