MOSUWAY pagposte og dominanteng 3-0 nga bintaha ang Magnolia Ang Pambansang Manok Hotshots sa ilang pagpakigbatok og balik sa Meralco Bolts sa Game 3 sa Philippine Basketball Association (PBA) 2021 Philippine Cup best-of-seven semi-finals series karong alas 3:00 sa hapon, Oktubre 8, 2021, sa Bacolor, Pampanga.
Niadtong Miyerkules, Oktubre 7, 2021, ang Hotshots ninglampaso sa Bolts, 92-78, sa Game 2 nga maoy naghatag kanila og 2-0 nga bintaha sa series.
Dili ikalimod nga naa tanan sa Hotshots ang bintaha ning maong engkuwentro hilabi na kay adunay angol sa iyang wa nga tuhod ang sinaligang sentro sa Bolts nga si Raymund Almazan.
Apan alang sa Hotshots, wala pa sila’t rason aron magmaya gumikan kay wala pa nila nakompleto ang ilang misyon.
“Kasi iyun ‘yung... kumbaga ‘yung nag-eensayo kami, ‘yung preparation namin sobrang vital going to the game. So siguro one step at a time muna,” matod sa pambatong pointguard sa Hotshots nga si Paul Lee.
Si Hotshots coach Chito Victolero mitataw nga bisan sa haw-ang sa ilang puwersa, aduna gihapon saktong ikabuga ang Bolts.
“We’ll treat the (Friday) game as possession-by-possession. We live on that. Kailangan muna naming magpahinga, makakuha ng energy again in preparation for tomorrow’s practice and game namin sa Friday,” asoy ni Victolero.
Sa main game, buakon sa San Miguel Beermen ug Talk N’ Text Tropang Giga ang ilang 1-1 nga panagtabla sa ilang panagharong og balik sa Game 3 sa kaugalingon nilang semis series karong alas 6:00 sa gabii.
Gilauman nga kulbahinam na sab kini nga engkuwentro sama sa nahitabo sa nag-unang duha ka mga duwa sa series.
Sa Game 1, ningdaog ang KaTropa, 89-88, samtang nakabawos ang Beermen sa Game 2, 98-96, pinaagi sa buzzer-beater ni Marcio Lassiter.
“We have to control the tempo because we’re facing a very talented and energetic team. Most of them have fresh legs so we need to be able to handle their pressure better and also limit our turnovers,” batbat ni Beermen coach Leo Austria.
Mao sab kini ang panglantaw sa Tropang Giga.
“We need to find ways to compete against the most talented, deepest team in the league,” asoy ni TNT coach Chot Reyes.(ESL)