DAGHANG mga kandidato ang imong pilion karong eleksiyon sa Mayo 9, 2022. Ang botante sa Cebu City mobotar og presidente, bise presidente, 12 ka senador, kongresista, party-list representative, mayor, bise mayor, ug walo ka mga konsehal.
Sa pagka-presidente, molansar sila Senador Manny Pacquiao, Mayor Isko Moreno, Senador Ping Lacson, ug si kanhi senador Bongbong Marcos. Gipaabot usab nga mo-file sa pagka-presidente si Bise Presidente Leni Robredo, Mayor Inday Sara Duterte Carpio ug kanhi defense secretary Norberto Gonzales. Wa pay labut ang mi-file na sa ilang certificate of candidacy sa pagka-presidente nga kapin sa 20 ka mga tawo.
Sa Cebu City magbangga ang Mike Rama-Raymund Garcia tandem batok sa Margot Osmena-Franklyn Ong team. Kaniadto murag nagka-problema ang administration party nga Barug-PDP-Laban tungod kay gituhoan nga molansar usab pagka-mayor si kanhi konsehal Joey Daluz. Apan suma pa nahilot na kini. Karon hinuon si kanhi DILG undersecretary Bimbo Fernandez nga suod ni kanhi mayor Tomas Osmena mi-file og certificate of candidacy (COC) kay modagan pagka-bise mayor ubos sa Liberal Party (LP). Natural makakuha kinig boto sa mga dumadapig sa BOPK. Si actor Richard Yap modagan usab sa pagka-kongresista sa north district sa siyudad. Makaatbang niya ang kanhi niya kaalyado nga si Konsehal Niña Mabatid sa Barug. Pabor kini kang kanhi kongresista Cutie del Mar sa BO-PK. Si kanhi mayor Osmena makig-atbang kang konsehal Edu Rama. Si Osmeña nahimong representante kaniadto dinhi sa south district.
Sa Lalawigan sa Sugbo, mag-atbang sila si kanhi Tourism secretary Ace Durano ug incumbent governor Gwendolyn Garcia. Si incumbent Bise Gobernador Junjun Davide maoy bise ni Durano samtang wala pa masayri kon si kinsa ang pares ni Garcia.
Nasayran nga gibisita ni Sen. Manny Pacquiao si Durano sa dihang dinhi sa Sugbo si Pacman. Gituhoan man gani nga siya maoy kandidato ni Pacquiao sa pagka-gobernador. Apan karong bag-o adunay report nga si Durano gitudlo kuno nga regional president sa Central Visayas sa Partido Pilipino sa Pagbabago (PPP) nga maoy partido nga maoy nag-nominate kang Mayor Sara nga ilang presidential candidate sa Mayo 2022. Mao kini makalibug kay ang official spokesperson ni Inday Sara mao si Liloan Mayor Christina Frasco nga anak ni Gov. Gwen nga iyang kaatbang. Unsa may kamatuoran niini?
Ang gituhoan sa uban mao nga mas modaog ang kandidato sa administrasyon kay daghan man kuno ang kandidato sa oposisyon. Dili ako mokalawat niana tungod kay wala ko makahinumdum nga adunay kandidato sa pagka-presidente nga nakadaug pinaagi sa majority vote kun labaw sa katunga sa mga mibutar, kon dili pulos ra plurality kon kinadaghanan og botos ang gidag-an sa usa ka kandidato sa pagka-presidente. Dili usab pagasabton nga ang mga botante dili maantigo mopili sa ilang botaran. (mannyrabacal1144@gmail.com)