SECURITY guard nga gustong mo-jerjer sa iyang kanhi uyab nanghulga sa 21 anyos nga dalaga nga iyang ipakatap sa social media ang ilang hubo nga hulagway ug sex kon siya balibaran, nasikop sa joint entrapment operation sa Regional Anti-Cybercrime Unit (Racu) 7 ug Moalboal Police Station alas 5:00 sa hapon sa Miyerkules, Oktubre 6, 2021 sulod sa usa ka convenience store sa Brgy. East Poblacion, Lungsod sa Moalboal.

Wa na makaeskapo si Rodel Macahilos Cuevas, 24, lumad nga taga Jimalalud, Negros Oriental, dihang gisikop sa mga pulis tungod sa reklamo sa iyang kanhi uyab.

Si Police Senior Master Sgt. Stewart Bayang sa Moalboal Police Station nga nahinabi sa Superbalita Cebu nagkanayon nga gihadlok ug gibaharan ni Cuevas ang dalaga nga iyang ipakatap sa social media ang ilang mga hubo nga hulagway ug kumbate sa katre kon dili makigkita kaniya.

Si Cuevas, matod sa dalaga, gusto nga makig-sex kay gimingaw na siya human sila magkabuwag.

Ang dalaga nga taga Barangay Taboc, Dakbayan sa Mandaue, nangayo og abag sa iyang mga higala ug nidangop sa Racu 7.

Matod pa ni Bayang nga gisabot ni Cuevas ang dalaga nga magkita sila sa 711 nga tindahan sa Brgy. Poblacion East.

Giuyonan usab kini sa dalaga nga gikuyogan na sa mga pulis.

Naka-posisyon nang daan ang team sa cyber crime unit ug Moalboal police ug dihang niduol ang dalaga sa iyang kanhi boyfriend, gisikop gilayon si Cuevas.

Nakuha sa kapulisan ang cell phone isip ebidensiya batok kang Cuevas.

Si Cuevas nangayo og pasaylo sa dalaga, apan ang nauwahi nipadayag nga dili na siya makigbalik ug mopasaka siya og kaso.

Si Cuevas nisulti sa kapulisan nga nahimo niya ang krimen sanglit wala siya makadawat nga gibuwagan sa dalaga.

Pasakaan siyag kalapasan sa Republic Act 10175 kun Cyber Crime Prevention Act of 2012.