MAGPAPILI isip independente nga kandidato si Cebu City Councilor Dave Tumulak isip mayor sa Dakbayan sa Sugbo sa eleksyon sa Mayo 2022.
Si Tumulak surpresa nga nag-inusara nga niduso sa iyang certificate of candidacy (COC) kagahapon sa hapon sa Huwebes, Oktubre 7, sa Commission on Elections.
Ang third termer nga konsehal sa dakbayan niingon nga siya ang magsilbing alternatibong kandidato sa labing taas nga posisyon sa City Government sanglit mga ilado ug prominente nga apelyido ang iyang makontra sama nila ni kanhi konsehal Margot Osmeña ug Acting Mayor Michael Rama.
“Ako sayon ra kaayo kong duolon, maestorya, maminaw ug gawasnon sad ko sa pag-awhag sa mga tawo nga gustong moalagad sa atong katawhan nga maghiusa ta and this is it. Duna moy better alternative (for mayor) sa atong dakbayan,” padayag ni Tumulak.
Matod ni Tumulak nga aduna siyay Certificate of Nomination and Acceptance (Cona) apan wala niya gamita sanglit gusto siya nga mag-independente.
Iya kining ibalik sa national party nga maoy naghatag niini.
“I will not use this Cona para pagpakita sa katawhan nga mas maayo ning independente para sa kaayohan. Ma-datu ka o ma-pobre, ma-unsay political color, andam kong makighiusa kanila, kahatagan nato ang atong mga kaigsuonang Sugbuanon og alternatibo,” dugang ni Tumulak.
Nag-una sa iyang plataporma mao ang pagpa-abunda sa pagkaon, kahatagan og maayong panglawas ang mga molupyo ug daghan pa.
BOPK MI-FILE
Ang mga kandidato sa Bando Osmeña Pundok Kauswagan (BOPK) hingpit nang nakaduso sa ilang certificate of candidacy (COC).
Si kanhi Cebu City south district councilor Margarita “Margot” Osmeña maoy ilang standard bearer pagka-mayor samtang si kanhi mayor Tomas Osmeña, iyang bana, maoy magpapili pagka-kongresista sa south district.(PAC)