DUHA ka mga drug den sa Duljo Fatima, dakbayan sa Sugbo, gironda ug gipangguba sa Philippine Drug Enforcement Agency (PDEA) 7 sa Huwebes sa alas 7 sa gabii sa Oktubre 7, 2021 nga mi resulta sa pagka sikop sa 10 ka mga tawo.
Ang unang drug den nga giguba sa PDEA 7 nahimutang sa sitio Riverside nga gipadagan ni Ernesto Lagahid Coronel, kinsa lakip sa nasikop.
Nadakpan usab nila si alyas Nestor, 52; Rowena Tampus Purazo, 35; Genniver Pelicano Palaubsanon, 31; Ritchie Subingsubing, 38;ug Elmer Gata 44.
Nakuha gikan kanila ang 20 ka putos sa gituohang shabu nga motimbang og 16 gramos nga gibana-banang balor og P108,800 ug mga drug paraphernalia.
Ang ika duha nga drug den nahimutang sa sitio Micabaja, diin ila na usab nga nadakpan ang drug den maintainer nga si Charlet Sheen Auristela, alyas Inday, kauban sila si Rey Yap, 57; Mary Evelyn Atillo 49; Violeta Auristela, 48;, ug Conrado Generalao 32.
Nakuha gikan kanila ang 17 ka paketeng shabu nga mo kantidad ang tanan og P74,800 ug ang mga gamit sa pag suyop.
Matod ni Leia Alcantara, public infornation officer (PIO) sa PDEA 7 nga tulo ka adlaw ang ilang case buildup human makuha ang kasayoran gikan sa ilang confidential informant labot sa pagpadagan sa mga drug den sa maong mga dapit. (AYB)