SUGOD sa alas sa hapon sa Biyernes, Oktubre 8, 2021, di una paagian ang usa ka bahin sa Manipis Road tungod sa padayong pagdahili sa yuta ug pagpangatagak sa mga bato.
Si Jonathan Tumulak, pangulo sa City of Talisay Traffic Operations and Development Authority (CT-TODA), niingon nga sirhan sa mga motorista ang sityo Langoyon, Barangay Manipis sugod sa alas 5 sa hapon hangtod sa alas 5 sa buntag pagkasunod adlaw.
Matod ni Tumulak nga alang kini sa seguridad sa tanang mga motorista nga mangagi sa dapit.
" Hangtod karon nagpadayon ang pagpangatagak sa mga bato ug yuta. Gisusi pa sa DPWH unsay hinungdan," matod ni Tumulak sa interbyu sa Superbalita Cebu.
Ang mao nga mga oras ngitngit busa di makita kaayo ang dan busa kuyaw sa mangangi.
Ilang nakab-ot ang hukom human sa tigom tali sa CT-TODA, Department of Public Works and Highways (DPWH), kapulisan, City Disaster Risk Reduction and Management Office (CDRRMO), city engineers office ug barangay officials sa Manipis, Kampo 4 ug Jaclupan.
Niadto lang Miyerkules, Oktubre 6, gibuksan alang sa mga motorista ang karsada nga nagdugtong sa Talisay ug Toledo City tungod sa mga landslide nga dala sa kanunay nga mga pag-uwan.
Off limits usab ang Manipis Road sa leisure biking. (REV)