NAKADUSO na sa ilang kandidatura ang mga magpapili sa Partido Barug-PDP-LABAN sa dakbayan sa Sugbo sa Commission on Elections (Comelec).
Sila si Acting Mayor Michael Rama ug City Councilor Raymond Garcia, kinsa maoy magpapili pagka-mayor ug bise-mayor sa partido, maoy nagpauwahi sa pagsang-at sa ilang certificate of candidacy (COC), Oktubre 8, 2021.
Lakip sa niduso sa ilang COC mao silang City Councilor Niña Mabatid ug City Councilor Eduardo Rama para pagka-kongresista sa north ug south district.
Ang mga kandidato pagka-konsehal sa north district mao silang Noel Wenceslao,Joel Garganera, Jerry Guardo, Edgardo Labella II, Pastor Alcover Jr, Melvin Legazpi,Peter Mancao, ug Maria Buanghug.
Sa south district silang Dondon Hontiveros, James Cuenco, Phillip Zafra Renato Osmeña Jr. Jocelyn Pesquera, Rey Gealon, Francis Esparis ug Harry Eran.
Ang mga sakop sa Partido Barug-PDP Laban wala magdungan og abot sa Comelec office aron ilang masunod ang social distancing.
Si Rama, sa iyang bahin, nagkanayon nga usa sa iyang hatagan og prayoridad mao ang pagsulbad sa baha nga kanunay nga masinati sa Cebu City panahon sa kusog nga uwan.
Ang acting mayor nagkanayon nga niadtong 2016, adunay P1.5 bilyones nga pundo para sa drainage, apan dihang nidaog si kanhi mayor Tomas Osmeña, wala na kini mapatuman hinungdan nga iyang tiwason ang programa nga wala gipadayon.
Siya nagtuo nga kini maoy makahatag og solusyon sa problema sa baha.
Hingusgan usab niya ang social services, pagpanalipod sa kinaiyahan ug pagsiguro nga ang mga Sugbuanon adunay maayong panglawas hilabi na niining panahon sa pandemya.
Si Garcia, sa iyang bahin, niingon nga iyang ipadayon ang nasugdan niya isip konsehal, apan niiing puntoha mao ang pagsiguro nga ang City Council padayon nga mahimong ehemplo sa maayong panerbisyo.
Siya maoy usa sa mga konsehal nga nipasar sa ordinansa nga maghatag og libreng uniporme ug school supplies sa elementary students, nagpanday sa city ordinance aron maumol ang Cebu City College nga pending pa sa konseho, Anti Noise Ordinance aron ang mga nagtrabaho ug nag-eskwela di mabalda niining panahon sa pandemya.
MARY ANN
Samtang nakaduso sa iyang COC si kanhi konsehal Mary Ann de los Santos sa Bando Osmeña Pundok Kauswagan (BOPK) nga giubanan mismo ni kanhi mayor Tomas Osmeña ug iyang asawa nga si Margarita Osmeña, standard bearer sa partido, uban ni Kongresista Rodrigo Abellanosa.
Si de los Santos niingon nga wala siya maka-file niadtong Oktubre 7 atol sa pagduso sa mga BOPK candidate sanglit nag-renew siya sa iyang passport sa Department of Foreign Affairs (DFA).(PAC)