DAKONG opisyal sa Alpha Kappa Rho (Akrho) nga usa usab ka negusyante namatay sa ambush sa riding in tandem sa alas 5:30 sa hapon sa Biyernes, Oktubre 8, 2021, sa may eskina sa Tres de Abril, A Lopez street, Brgy. Calamba, dakbayan sa Sugbo.
Wala na madala pa sa tambalanan si Richard Buscaino, kanhi konsehal sa Brgy. Calamba ug tag-iya og punerarya, kay namatay diha-diha human maigo makaupat ka mga higayon sa pagpusil sa gunman.
Matod ni Police Staff Sergeant Vincent Gonzalvi, imbestigador sa Sawang Calero Police Station, nga nagsubay sa karsada padung sa Labangon si Buscaino dihang giatangan sa may rotunda sa duha ka mga tawo nga nag-angkasay sa motorsiklo.
Ang duha ka killers pulos naka full-face helmet nga nag-atang nang daan sa dapit.
Gituohan nga dunay nag-monitor sa lihok ni Buscaino nga maoy naghatag og impormasyon sa mga gunman.
Matod ni Gonzalvi nga upat ang mga samad ni Buscaino, duha sa dughan, usa sa wala nga kamot ug usa sa buko-buko.
Ilang na recover ang unom ka mga kabhang sa wa pa matino nga kalibre sa pusil.
Usa ka “Leni,” nga nahinabi sa dySS Super Radyo Cebu, nibutyag nga nakadungog siyag buto-buto sa armas ug sa iyang pagtan-aw dunay babaye nga naghapa nga una niyang gituohan nga maoy gipusil.
Sunod niyang nakita ang gunman nga nagbitbit og armas nga iyang gihulagway nga taason, niwang, nag jacket og gray nga dunay hood.
Niabot usab dayon ang usa ka motorsiklo ug nisakay ang gunman dayon nisibat padung sa Labangon.
Si Manuelito Salayao, kawani sa San Fernando Funeral Homes nga iya ni Buscaino nga nahinabi sa dySS, nibutyag nga gikan sa ilang opisina sa San Fernando Funeral Homes sa Natalio Bacalso nag-atiman sa ilang mga kustomer.
Matod ni Gonzalvi nga ila pang gitino ang motibo sa pagpatay.
HULGA
Niadtong 2018, si Buscaino nisumbong kang kanhi mayor Tomas Osmeña nga duna siyay mga hulga nga nadawat.
Sa Marso 2018, ang sakyanan ni Buscaino girakrakan sa wa pa mailhing tawo nga nagmotorsiklo samtang gi-park sa atubangan sa iyang punerarya.
Gibutangan usab kini og paskin nga nanghulga kaniya.
Ikaduha kadto nga pagpangrakrak kay nianang Pebrero sa samang tuig, ang iyang punerarya mismo gipaarakan nga nakamugnag kadaut sa mga porlon.