Isip pagpangandam sa iyang pagsaka og balik ibabaw sa ring human sa hataas nga pagpahuway, hinayhinay na sa iyang ensayo ang kanhi two-time world challenger nga si King Arthur Villanueva.
Si Villanueva, usa sa mga kanhi pambato sa nasira na nga Ala Boxing Gym, ubos na karon sa pagdumala sa usa ka Slovenian manager nga si Hinko Kostanjevic.
Sa iyang ensayo dinhi sa Sugbo, ang 32 anyos nga taga Bago City, Negros Occidental, temporaryong nagpaubos sa pagdumala sa beteranong boxing trainer nga si Christopher “Pingping” Tepora sa Big Yellow Promotions.
Si Tepora maoy kanhi boxing coach ni WBO world champion Johnriel Casimero.
Gibutyag ni Villanueva nga dunay laraw ang iyang manager nga adto na sila sa Europe magbasehan.
Bugtong kauban ni Villanueva ubos sa iyang bag-ong manager ang inilang kanhi Philippine team member nga si Mark Barriga.
“Bali nag hangyo lang ko ni Pingping (Tepora) nga siya sa maggunit nako para sa dula naku sa Dec. Naa sab plano ako manager nga didto mi mag base sa Europe,” matod ni Villanueva.
Dala ang 33-4-1, 18KOs nga baraha, si Villanueva mipukan kang Bryan Tamayo niadtong Marso ning tuiga sa Omega Pro Sports International boxing Promotions “Kumbati 9” sa IPI Compound sa Mandaue City.
Gibutyag ni Villanueva nga posibling paawayon siya ni coach Tepora sa usa ka boxing promotion karong bulan sa Disyembre.
Hinuon, gihangop ni Tepora ang presensiya ni Villanueva sa ilang gym sanglit makatabang kini sa training sa uban niyang mga boksidor ilabi na sa sparring sessions.
Gikompirmar ni Tepora nga nagplano siya nga ilakip si Villanueva sa usa ka promotion kon mahinayon karong Disyembre.
Si Villanueva, nakaaway na alang sa world title niadtong Hulyo 6, 2019 batok sa defending champion nga si Nordine Oubaali apan napildi kini pinaagi sa technical decision.
Nakasangka na usab siya ni kanhi world champion Zolani Tete alang sa WBO interim bantamweight title apan napildi sa unanimous decision. (JBM)