Kon ang semifinals series sa nagpadayon nga PBA All-Filipino Conference Cup naghubit sa panagsangka tali sa mga teams sa MVP Group of Companies nga iya ni Manny V. Pangilinan ug sa San Miguel Corporation squads ni Ramon S. Ang, dili halayo ang posibilidad nga mao usab kini ang mahitabo sa finals.
Kini tungod kay sa kamada ning sayong bahin sa tagsatagsa nila ka mga series, ang Magnolia Hotshots (team sa SMC) ug ang TNT Tropang Giga (iya usab ni MVP) mao may naghupot karon sa bintaha.
Kon dili lang mausab ang momentum, hayag pa unya sa takdol nga buwan ang panag-abot sa Hotshots ug sa Tropang Giga sa championship series.
Ang Hotshots nakapakita sa ilang dominasyon batok sa Bolts sa Games One ug Two aron sakmiton ang bintaha, 2-0, apan nabawsan kini sa Game Three niadtong Biyernes, 2-1.
Pero bisan pa man sa kadaugan sa Bolts sa Game Three, sa gihapon wa mausab ang akong panglantaw nga ang Hotshots sa batan-ong coach nga si Chito Victolero maoy unang makataak sa finals.
Tinuod nga nidaog ang Bolts nga wala ang ilang sinaligan sa ilawom nga si Raymond Almazan kinsa nakaangkon og angol sa Game Two, pero ang dakong pangutana kon makalahutay ba sila sa series nga wala ang ilang 6-6 nga sentro.
Sa ka beterano ni Bolts coach Norman Black ug ubos ning iyang mga batan-ong grupo, daw og nagsalig pa gihapon ang team sa breaks of the game aron mokutlo og kadaugan.
Ang kakuwang sa ilang depensa nga mao untay makasugpo sa ataki nila ni Calvin Abueva ug Ian Sangalang ug sa mga gwardiya nga gilangkuban nila ni Paul Lee, Jio Jalalon ug Mark Barroca maoy butang nga wala pa mahatagi og solusyon ni Black. Gidugangan pa sa pagkawagtang ni Almazan.
Sa laktod nga pagkasulti, mahimong makakita pa og solusyon si Black niini apan nagkinahanglan og taas nga panahon aron kini mapahaom.
Ang kombati tali sa Beermen ug Tropang Giga maoy kulbahinam nga sumsuman.
Pulos dunay igong katakos ang matag habig. Sangka sa mga dekalidad ug beteranong mga magduduwa sa lega.
Sa pagkakaron, nagbawosbawos ang duha. Sa Game One idaog ang TNT, 89-88, apan gibawsan kini sa Beermen sa Game Two, 98-96, aron tablahon ang series, 1-1.
Apan gipamatuod sa TNT nga di taghap ang ilang kadaugan sa Game One pinaagi sa paglubong sa SMB sa Game Three, 115-98, alang sa 2-1 nga labaw sa series.
Sa tulo nila ka duwa, ang San Miguel maoy adunay bati og attitude sulod sa korte kay naobserbahan nga ari ra ni maninuod og maayo sa fourth quarter.
Nakahibawo si TNT coach Chot Reyes niini ug labing siguro mao ni iyang gipangandaman.
Tawo-por-tawo nakabintaha gyud ang Beermen batok sa Katropa. Kini tungod sa higanteng si June Mar Fajardo ug ang mga backup niini nga gilangkuban sa mga players nga sagad anaa sa top five sa PBA draft.
Pero kon dili gyud maka disiplina ug maka-adjust si SMB coach Leo Austria niini, di nako ikasurprisa nga manamilit sila. Mark my word. jun.migallen22@gmail.com