SECTIONS
Superbalita Cebu
Saturday, November 27, 2021
SUPERBALITA CEBU

34 ka pamilya nga bahaanan gibayran og P35k sa Siyudad

KUYAW: Dihang nagbunok ang uwan mga semana kapin ang nakalabay, pipila ka mga balay sa daplin sa Kinalumsan River sa Barangay Mambaling, Dakbayan sa Sugbo nameligro. Tungod sa hulga sa baha, ang Cebu City nagpalawom sa kasapaan gikan sa ubos padung sa ibabaw. / AMPER CAMPAÑA

Nibayad na ang Cebu City government og tag P35,000 ngadto sa 34 ka mga pamilya nga nagpuyo duol sa sapa sa Barangay Mambaling isip financial assistance human sila gipapahawa tungod kay “high risk” na kon mag flash flood.

Kini matod ni Cebu City Councilor Jerry Guardo, chairperson sa City Council’s committee on infrastructure, kinsa nagkanayon usab nga nag deploy na sila og Prevention, Restoration, Order, Beautification and Enhancement (Probe) personnel niadtong Biyernes, Oct. 8, 2021, aron pag assist sa mga lumolupyo sa pag bakante ug paghawan sa lugar.

“Ang diri sa Mambaling, actually, daghan kaayong mga structures ang luyo sa Gaisano Mambaling. High risk na kaayo sila (settlers) didto kay nisaka man ang tubig unya delikado kaayo sa flash floods,” matod niya.

“They preferred to kuan man financial assistance. So, it’s now up to them to find for ilahang temporary kapuy-an,” dugang niya.

Sa nauna na nga taho sa weather bureau Philippine Atmospheric Geophysical Astronomical Services Administration (Pagasa), nga tungod sa hulga sa La Niña karong katapusang quarter sa 2021, kusog kun daghan nga mga pag-ulan ang posibleng mahitabo.

Tungod niini, angay nga mangandam ang siyudad sa posibleng mga pagbaha ug landslides labi na sa downtown nga dali rang bahaon kon ting-ulan.

GIPALADMAN

Matod ni Guardo nga di na kaya sa kasamtangang gilapdon ug gilawmon sa mga sapa sa Syudad ang volume sa uwan.

Tungod niini, gikinahanglan na ang pag-implementar sa mga flood control projects sama sa widening ug deepening niining mga sapa.

“Simultaneously (and ongoing) ni, but we started from the outfall. Ang bukana sa sapa, sa dagat, diha sa Lahug river, Guadalupe river, and Kinalumsan river,” matod niya human siya niingon nga downstream to upstream ang approach sa ilang proyekto karon.

Samtang, dugang ni Guardo nga nagpahigayon sab sila og ocular inspection karon ning semanaha ug nag deploy sila og mga tawo gikan sa City Engineering aron sa pag ayo ug pag-restore sa mga na-damage nga riprap wall sa Barangay Buhisan.

Ang kalit nga kusog nga pagbundak sa uwan niadtong Oktubre 1 hinungdan sa pag-awas sa Kinalumsan River, nga moagi sa Barangay Buhisan, Labangon, Tisa, Punta Prinsesa, ug Mambaling, ug hinungdan sa pagbaha sa pipila ka mga lugar sa Siyudad.

Matod usab ni Guardo nga nag-deploy sab sila og mga equipment aron malimpyuhan ug maagian nga temporaryo ang landslide area ngadto sa Barangay Sirao.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!