Niadtong bata pa ko, magsige ra ko og tan-aw og biseklita ug manghuwam kay di mi maka afford pagpalit bisan gani ligid ra. Human mamatay ang among anak nga si Heart, wa ko magdahom makapalit ko og 16 ka mga biseklita. Ang tanan nakong mga anak, apil ang akong asawa, nakat-on og biseklita.
Karon, malipay kong magtan-aw sa mga pamilya nga magbiseklita. Ang akong higala nga si Clinton Gairanod, nurse sa Vicente Sotto Memorial Medical Center (VSMMC), ug iyang kapikas nga si Joyce, magkuyog sa pagsikad uban sa ilang mga anak. Kon di manaka sa Busay, mangabot sila hangtod sa Bogo City.
Di ko maka imagine sa gibuhat sa gibuhat sa akong mga higalang Clinton ug Joyce sa pag-engganyo sa ilang mga anak nga magbiseklita, kon di sa tungason nga mga dapit, adto sa layo. Mga 100 kilometers kapin ang sikaron gamit ang ilang mga road bike.
Sa una sa paghimamat namo nila ni Clinton ug Joyce sa panimalay sa mga Garganera kay adto mi magtapok sa among mga night ride, gagmay pa ang mga bata. Sama sa among mga anak ni Chelo, nagsugod sila og kat-on sa folding bikes nga gi-collect ni Clinton gikan ni Jay Garganera. Karon, grabe na sila og endurance kay lagyo na og rides. Nahimo pa silang ehemplo sa mag pamilya nga magbiselita.
Makakita ug masayod ko sa ilang rides thru sa posts sa among higalang magtiayon. Ang magtiayong Gairanod maoy maayong ehemplo sa biking community. Ila ning na sustain.
EPEKTO
Maanindot og epekto ang pag biseklita sa panghuna huna sa tawo. Sa ako nang giingon, matod sa mga eksperto, di lang sa lawas maayo og epekto ang pag bike, hasta usab sa panghuna huna. Duna kini maayong epekto sa utok sa tawo. Bisan sa kinabuhi sa tawo, ang impact niini sa estado sa panghuna huna ug panglantaw, maayo kaayo, matod sa mga ekspeto.
Hinuon di sab tanan kay duna bayay uban diha manukmag ug mangulata na hinuon, kon di man gani, manghagad og sukmagay. But overall, ang epekto positibo kaayo.
Sa pamilya, sama sa mga Gairanod, paagi kini sa bonding. Karong panahuna, usa ni sa maayong epekto sa pandemic kay daghan na karon sa mga pamilya nga nakakita nag higayon nga sa balay na lang magpuyo o magkuyog sa pagpanggawas aron manuroy.
NAGPABUKID
Dunay maanindot nga mga talan-awon nag trending sa social media human mag post ang pipila ka bikers. Kon wa pa tingali ang pandemic, way maka appreciate sa mga talan-awon sa kabukiran. Apan tungod kay di maayo ang pagsuroy sa siyudad, nabalhin ang attention sa bukid.
Ehemplo lang ini mao ang Manipis Road. Sa 2011 ngadto sa 2012 nga amo ning agian maihap lang ang manungas nga magbiseklita. Ang amo rang makan-an mao ang tindahan ni Fe Labsan, unahan sa Manipis barangay hall.
Karon, maora nag uhong ang mga tindahan nga nanurok sa kadaplinan dihang nanuroy mi ni Chelo sa among pagpaingon sa Toledo City ngadto sa Balamban. Lahi na. Maorag ang tanang tawo nagpabukid.