Human sa substitution maneuver ni Mayor Rodrigo Duterte sa 2015 nga napili gyud nga presidente karon, nahimong dili na Oktubre 8 karon ang deadline sa pagsang-at sa Certificate of Candidacy kun COC.
Kinahanglan maghulat na gyud kita sa Nobiyembre 15 aron ma-final ang listahan sa mga kandidato. Ug gipaabot pa si Davao City Mayor Inday Sara Duterte-Carpio aron mosang-at sa iyang COC alang sa pagka presidente.
Isip preparasyon alang niini, nisang-at na si iyang COC si Leo Fernandez nga maoy presidente sa Partido Pilipino sa Pagbabago (PPP). Dayon, dihang hapit na mo-close ang Comelec sa miaging Biyernes, nisang-at sab sa iyang COC gikan sa PDP-Laban Cusi Wing alang sa pagka presidente, si Sen. Bato dela Rosa.
Wa lang ko makabantay sa PRP ni anhing Sen. Miriam Santiago nga mao sab daw ang behikulo ni Inday Sara sa pagka presidente.
Dunay nag-ingon nako kagahapon sa buntag nga niingon ang Commission on Elections (Comelec) di na kuno makasang-at pa og COC si Inday Sara. Hmmm. Kon tinuod man nga niingon ang Comelec, mausab na inig abot sa Nobiyembre. Kinahanglang subayon ang script.
Sa pagkakaron hinuon, dali kaayong nakasaway si Manila Mayor Isko Moreno kang Vice President Leni Robredo nga giingon niyang peke. Bitaw, kinahanglan si Isko og mopakitag labok batok sa ubang mga kandidato nga kontra ni Presidente Duterte.
Kon atong tukion man gud, si Leni maoy lider sa oposisyon sukad pa sa pagka daog ni Digong kaniadtong 2016. Ikatulo man niya gipildi ang Bongbong Marcos. Ikatulo kay napildi sa eleksyon, unya ikaduha sa mga maniubra iyang protesta.
Nasiguro ko nga si Bongbong malipay kon dili modayon sa pagdagan ang iyang kaayado nga si Inday Sara. Nagtuo kini siya nga moadto kaniya ang mga tigsuporta ni Inday kon ugaling mag mayor na lang gyud sa Davao City.
Apan, mailog kaha ni Isko ug Bongbong ang mga tigpaluyo ni Inday Sara? Mobotar kaha sila og taga Luzon? Di ba kaha sila motapon hinuon kang Sen. Manny Pacquiao?
Wala gyud ko makalimot sa sulti ni Joeyboy Holganza, ang regional chairman sa PDP-Laban Koko wing, dihang nagkakita mi sa lobby sa Radisson Hotel dihang nibisita si Pacman sa Sugbo.
Samtang nagsigi mig tan-aw sa mga lider ni Sen. Pacquiao nga diha sa dakong hawanan sa maong hotel, niingon siya nga mga lider man kini sila ni Duterte sa 2016.
Ug unsay ipasabot niini, nga si Sen. Pacquiao nakapahak gyud sa kampo sa mga Duterte sa Visayas ug Mindanao. Kon di man modayon si Inday Sara sa pagdagan alang sa pagka presidente, nakita na nako nga adto kini sila padulong kang Pacquiao.
Kadako ang ngisi unya ni Tonton Antogop, ang secretary-general sa Manny Pacquiao for President Movement (MPPM).
Bisan pa man, nagsigi ko og pag-aninaw sa mga tigsuporta ni Leni Robredo nga maoy nakabenepisyo sa kada adlaw na mga balita kabahin sa dakong pangurakot gamit ang Pharmally. Lalim bay binilyon ka pesos na ang kawat oi.
Kahinumdoman, dalan lang ang nahimong isyu sa 2009 batok sa number 1 presidentiable nga si Manny Villar dihang ni-file sa ilang mga COC. Nahagsa intawn sa survey si Villar.
Sa 2015, si Jojo Binay sab ang number 1 nga presidentiable. Apan, grabi ang imbestigasyon sa giingong pangurakot niya ug iyang anak sa pagtukod og building diha sa Makati.
Apan ang kantidad niadtong mga isyo sa pangurakot batok nilang Villar ug Binay wala sa kumingking niining binilyon nga anomaliya sa Pharmally.
Akong gilantaw nga maigo man gyud si Inday Sara niining mga isyu batok sa iyang amahan. Bantayanan kon duna ba kiniy epekto sa popularidad sa mayor ug nagtuo ko nga duna kiniy kabug-aton sa iyang pagpinsar kon modagan ba gyud pagka presidente. (DM nako sa @anol_cebu)