Nanumbalik ang mga isyu karon nga nang file na ang tanang mga kandidato sa ilang certificates of candidacy, duna na dayoy naghisgot og mga proyekto nga nalimtan na unta, apan nabuhi.
Sama sa Bus Rapid Transit (BRT) system nga gihisgutan ni kanhi mayor Tomas Osmeña nga iya kunong prayoridad kon siya mapili ug makalingkod nga kongresista sa Cebu City south district hulip kang Kong. Rodrigo “Bebot” Abellanosa nga naa sa iyang katapusang termino.
Matod ni Osmena nga nalangay na kaayo ang pagpatuman sa BRT nga iyang giingong gikawat ni Secretary Michael Dino sa Office of the Presidential Assistant for the Visayas (OPAV). Apan matod ni Dino nga wa niya kawata ang BRT, kon di giusab ang desinyo ug pipila ka mga agianan kay inay mosulbad sa kahuot sa trapiko, makaingon na hinuot sa kahuot. Maangin pa ang kasikbit nga mga dapit sa siyudad sa Sugbo.
Bitaw, di angay nga dali-dalion ang pagtukod sa BRT kay mamahimo na hinuon kining problema. Mao ni ang nahitabo sa ubang mga nasod nga nisagop niini, sama sa Thailand ug Indonesia ug uban pang mga nasod nga nisagop niini.
Sa 170 ka urban nga mga dapit, 11 porsyento lang ang nakaangkon og gold standard, ang uban nahimong suliran. Lainlain man gud ang mga pamaagi sa pagpatuman sa BRT. Wa sab magpasabot nga kon malampuson ang BRT system sa Curitiba, Brazil, epektibo usab kini sa ubang mga dapit.
Mas maayo nga nahisgutan kini ni Osmeña kay ang mga Sugboanon wa na makadungog og balita kabahin niini gikan sa Department of Transportation (DOTr). Mas maayo kon maka update si Dino kon kumusta na ang gisaad nga magamit na ang unang phase sa BRT sa Disyembre. Apan bisan usa nga civil work wa pay nakita nga gitrabaho.
Di tuod angay nga patakaan og patuman ang BRT system, apan mas maayo kon ang kagamhanan, pinaagi ni Dino, mohatag og update kun kumusta na ang BRT?