USA ka stress and psychological debriefing ang gipahigayon alang ngadto sa usa ka barangay kagawad ug laing usa pa ka kaubanan niini dihang nabiyaan sila sa mga midagit kaniya atol sa sinukliay og bala tali sa mga rebeldeng New People's Army (NPA) ug kasundalohan niadtong Biyernes, Oktubre 8, 2021, sa Barangay Kimlawis, Kiblawan, Davao del Sur.
Sa report gikan sa kapulisan sa Davao del Sur, gipang-ila sa awtoridad ang mga biktima nga sila Barangay Kagawad Nilo Ehjoc Duazo alyas Lek Lek ug ang kauban niini nga si Salvador Caliano Gilio alyas Bador.
Nasayran nga niadtong Septyembre 16, 2021, nang-harvest ang mga biktima og saging dihang naagian sila sa mga rebelde dayon gipangdagit.
Rason unta sa mga rebelde nga pabuhian ang ilang kauban nga nasikop sa awtoridad kinsa dunay mga kasong kidnapping, daghang ihap sa kasong murder ug ang kalambigitan sa pagpananom og marijuana.
Dihang gihimo ang usa ka operasyon sa hiniusang puwersa sa awtoridad nasugatan ang grupo sa mga rebelde nga dala nila ang duha ka biktima.
Sa pagsinukliay og bala, daling nanagan ang mga armado ug nabiyaan ang duha nga gidagit ug ang mga gamit sa mga rebelde.
Hinuon, luwas na ang duha ka biktima diin gipailawom sila sa stress and psychological debriefing ning mga kasamtangan una sila ibalik sa ilang mga pamilya. (Jeepy P. Compio)