GIKAKURAT sa kabanay sa magtiayon nga politiko ang pag-atbang nila sa pagka-mayor sa Northern Kabuntalan, Maguindanao Province.
Una nang nag-file og certificate of candidacy (COC) sa Commission on Elections (Comelec) niadtong Oktubre 7 si incumbent Mayor Datu Ramil Dilangalen alang sa iyang ikaduha nga termino sa pagka-mayor sa lungsod.
Magpapili kini ilawom sa United Bangsamoro Justice Party (UBJP) sa Moro Islamic Liberation Front (MILF) kon diin ang mikandidato sab nga pagka-gobernador mao si Second District Congressman Esmael "Toto" Mangudadatu.
Apan niadtong Oktubre 8, niduso sab og COC ang iyang asawa nga si incumbent Vice Mayor Mary Jane Bayam Dilangalen ug giatbangan ang iyang bana sa pagka-mayor.
Ang bise mayor ilawom sa Nacionalista Party nga gipangulohan sa subling magpapili sa pagka-gobernador nga si incumbent Governor Bai Mariam Sangki Mangudadatu.
Daghan ang nagtuo nga dunay personal nga problema sa ilang relasyon ang magtiayon apan hangtud karon wala pa silay opisyal nga pamahayag sa publiko ug nagpabilin nga nagpakahilom.