Casimero nasagmuyo

NASAGMUYO si World Boxing Organization (WBO) bantamweight champion Filipino Johnriel Casimero nga wala siya nakakuha og suporta atol sa purse bid sa iyang mandatory title defense batok kang English Paul Butler nga maoy hinungdan nga makibhangan og dako ang iyang ganti.

Ang nagdumala kang Casimero nga mao ang MP Promotions nga gipanag-iya ni boxing legend Manny Pacquiao wala moapil sa purse bid hinungdan nga yano kining nadaog sa bag-ong promotional outfit nga Probellum sa kantidad lang nga $105,000, labaw lang og gamay sa $100,000 minimum nga gitugot sa WBO.

Gikataho nga adunay panagbikil sila si Casimero ug MP Promotions president Sean Gibbons nga tataw nga maoy hinungdan nga wala na moapil ang MP Promotions sa purse bid.

Isip defending champion, si Casimero makakuha og 75 percent gikan sa winning bid ug mokantidad kini sa $75,750, ubos kumpara sa six digits nga iyang ganti sa miagi niyang away.

Si Butler makakuha og 25 percent o $26,250 isip mandatory challenger.

Hinuon bisan sa iyang kasagmuyo, nagkanayon si Casimero nga moaway gihapon siya bisan wala siya’y madawat nga suporta gikan sa nagdumala kaniya.

“Lalaban kahit walang suporta!!! Let’s go! Lalaban para may maibigay ulit,” post ni Casimero sa iyang Facebook account nga napatik sa www.abs-cbnnews.com.

Ang Probellum nagplano nga ipahigayon ang away nila ni Casimero ug Butler karong Disyembre 11, 2021 sa Dubai o sa England.

Sa sayo pa, nagkauyon na unta si Casimero ug World Boxing Council (WBC) bantamweight champion Nonito Donaire nga magharong alang sa makasaysayon ug labing unang all-Filipino unification bout.

Gipirmahan na unta ni Donaire ang kontrata apan nagkanayon si Casimero nga wala pa siya'y nadawat nga kontrata.

Nasuta nga ang panagbikil nila ni Casimero ug Gibbons maoy hinungdan nga wala nakadawat og kontrata ang gitawag og Quadro Alas sa gikaintapang away.

Niabot na lang ang adlaw nga nihatag og kamanduan ang WBO kang Casimero nga depensaan niya ang iyang korona batok kang Butler.

Si Donaire gimanduan sab sa WBC nga modepensa batok sa iyang mandatory challenger nga usa sab ka Pinoy.(ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph