LABING bag-ong organisasyon sa industirya sa indigay sa kaanyag sa nasod, ang Hiyas ng Pilipinas, gilusad sa dakbayan sa Sugbo niadtong Oktubre 6, Miyerkules, sa Golden Peak Hotel and Suites.
Ang Hiyas ng Pilipinas maoy una nga Cebu-based national pageant. Kini nagtinguha sa paghatag og gahom sa mga batan-ong Filipina sa leadership ug community service.
Isip lider ug modelo sa katarong sa ilang komunidad, moapil sa mga kalihokan sa paghimo sa positibo nga kausaban pinaagi sa pagboluntaryo, fund raising ug advocacy.
Atol sa paglusad niini sa media sa nahisgotang hotel, ang mga sakop sa Board of Directors gipaila. Ubos kini sa pagpangulo ni National Director Eva Psychee Patalinjug, Chairman Ronald Elpa, Vice President Jesselle Saniel, Operations Director Roy Erwin Tizon, PR Director Maria Alma Maria, Director of Communications Auguste Izhar Pepito, Finance Director Sugar Borja Sagarino, Director of Legal Affairs Christian Bacus ug Director of Charity Karla Tandoy.
Ang mga mananaug sa nasudnong indigay, morepresentar sa nasod ngadto sa kalibotanong bangga sa tulo ka mga prangkesa nga nakuha sa Hiyas ng Pilipinas:
(1) Miss Elite World, tinuig nga international beauty pageant nga nagbase sa Egypt. Ang 2021 competition ipahigayon sa Fairmont Nile City ug boot camp sa Somabay, usa ka luxurious modern town.
(2) Miss Tourism Queen International. Usa ka homegrown title nga gipasiugdahan ni Tan Sri Datuk Danny Ooi, ug dunay prangkesa sa kapin sa 90 ka mga nasod. Kapin na sa 1,000 ka Miss Tourism delegates gikan sa nagkalainlaing bahin sa kalibotan ang nakaapil sukad sa 1993.
(3) Miss Tourism World. Namugna sa Great Britain, gitutokan sa Miss Tourism beauty pageant mao kanunay ang turismo sa matag nasod. Suod nga nakig-alayon sa kagamhanan ug tourist boards sa partner countries.
Atol sa press conference, ang mga opisyal sa organisasyon nipahibalo nga molibot sa tibuok nasod aron linawas nga paghashas sa mga aplikante, dili lang pinaagi sa nauso nga virtual screening.
Gipasabot nila nga mokuha og 10 ka kandidata gikan sa Luzon, 10 gikan sa Visayas ug 10 gikan sa Mindanao aron pagpakita nga patas ang kompetisyon.
Ang 30 ka opisyal nga kandidata ipahibalo sa ulahing bahin sa tuig ug ang indigay gikatakda sa ubang quarter sa 2022. Ang top winners makadawat og cash prize nga P500,000 ug gift packages.
Ang kuwalipikasyon sa pag-apil: Filipino citizen o dunay kaliwat nga Pinoy ug dunay passport, 5’3” ang gitas-on, with pleasing personality and good moral character, labing minus high school graduate ug atol sa pagpasa sa aplikasyon, wala moapil sa laing major beauty pageants.
Ang application form sa buot moapil sa unang indigay sa kaanyag, pwede mo-download niini sa website sa Hiyas ng Filipinas.
Ang Hiyas ng Turismo Pilipinas Foundation, Inc. nahimotang sa Unit 5 Lightsite Park, A.S. Fortuna, Banilad, Mandaue City, Cebu 6014.(PR)