NAGSUGOD si Cebu City Mayor Edgardo Labella niadtong Biyernes, Oktubre 8, 2021 sa iyang indefinite sick leave tungod sa iyang “on and off pneumonia.” Gibutyag kini ni Cebu City Administrator Floro Casas Jr.
Mao na kini ang ikawalo nga leave of absence sa mayor sukad sa iyang pagkahospital niadtong Mayo 2 hangtod sa Hunyo 6. Ang iyang ikapito nga sick leave, sigun sa ihap sa Sun.Star, gikan sa Septiyembre 20 kutob unta sa Oktubre 7, Huwebes.
Apan tungod sa tambag sa iyang doktor, wa una siya mobalik sa pagtrabaho, gipadayon niya ang iyang leave of absence. Busa lain na sab kini nga leave of absence, pero ning higayona, wa nay petsa nga gitagal kanus-a kutob, lawas na lang maoy mag-igo.
Atong makita nga gusto gihapon ni Mayor Labella nga moserbisyo sa mga Sugbuanon. Apan angay nga maoy una niyang atimanon ang iyang panglawas. Si Labella moalagad ug dunay ikaalagad. Ang problema kon ang lawas wa nay kusog aron makaalagad.
Si Casas miingon nga way angay nga kabalak-an kay naa man si Vice Mayor Mike Rama isip acting nayor. Ang nahitabo karon, kon si Mayor Labella dunay on and off pneumonia, si Mike Rama on and off sab isip acting mayor.
Isip acting mayor, si Rama maghupot sa tanang gahom sa usa ka mayor, gawas lang sa “power to appoint, suspend, or dismiss employees which can only be exercised if the period of temporary vacancy exceeds 30 working days.”
Matod ni Casas, posible nga ang indefinite leave extension ni Labella mosobra sa 30 ka adlaw. Apan “out of the question,” di posibleng mahitabo, nga mo-resign siya kay tiwason gyud sa mayor ang iyang termino. Mo-leave lang siya matag karon ug unya.
Apan atong atangan sa higayon nga molapas sa 30 ka adlaw ang leave of absence ni Mayor Labella kon kinsay unahon ni Acting Mayor Mike Rama sa pag-dismiss sa mga opisyales sa City Hall.
Angay sab nga i-update pirme si Labella sa mga panghitabo sa City Hall. Kay tingali inig balik sa kahimsog sa iyang panglawas, mobalik siya sa City Hall unya ang naglingkod nga mayor si Mike Rama na, si Margot Osmeña ba, o di ba kaha si Dave Tumulak.