NAMATAY ang usa ka 11 anyos nga batang lalake human nadat-ugan sa railings sa Cebu City Transportation Office (CCTO) ala 1:00 sa hapon sa Dominggo sa corner P. Burgos ug Legaspi Streets sa Barangay Sto. Niño, Dakbayan sa Sugbo.
Si Chris Brainer Q. Ugsang, nagpuyo sa nahisgutang lugar, namatay alas 5 sa hapon sa Dominggo sulod sa Cebu City Medical Center (CCMC) human makaangkon og samad sa agtang ug walang bahin sa ulo.
Ang pamilya sa bata naa lang sa aseras sa Barangay Santo Niño magkatulganan.
Si Chris Brainer naa gihaya sa Santa Cruz San Roque, Chapel sa Sitio Carbarex, Duljo-Fatima, Dakbayan sa Sugbo kay naa magpuyo ang igsuon sa apohan sa bata.
Si Enrique Ugsang, 52, apuhan nga nahinabi sa Superbalita Cebu nagkanayon, nga ang iyang apo uban sa inahan niini nga si Clarrisa Ugsang, naninda og kandila.
Kuyog ni Clarrisa sila si Chris Brainer ug manghod nga 4 anyos nga babaye.
Samtang si Enrique naghigda sa sidewalk uban ang manghod ni Chris Brainer, kalit nga nisinggit sa pagpangayo og panabang si Clarissa kay nadat-ugan iyang anak sa railings nga natumba.
Dunay mga tawo nga nitabang, samtang si Enrique dali nga niaswat sa iyang apo ug gidala sa CCMC.
Nakaangkog grabing kada-ot sa agtang ug walang habig sa ulo ang bata.
Matod niya nga ang doktor nisulti nga grabeng kadaut sa ulo ug naapektuhan ang utok.
Gitusukan og tubo agi og abag sa pagginhawa ug dextrose ang bata ug namatay.
ALI
Ang apuhan nibutyag nga ang dakong railings sa CCTO maoy gigamit nga ali sa karsada atol sa filing sa certificate of candidacy (CoC) sa Commission on Elections (Comelec) sa Cebu City.
Tulo ka dagkong railings ang gipabarog ug gisandig sa usa ka building sa nahisgutang lugar.
“Kuso-kuso ang hangin, unos ba kusog kaayo. Natumba ang railings naigo akong apo,” dugang ni Enrique.
Nakit-an niya ang apo nga nagtakilid dihang nadat-ugan sa dakong railings nga wala nay panimuot nga gihatud sa tambalanan.
Si Bobby Nalzaro sa dySS Super Radyo maoy naningkamot nga mapaabot sa City Hall ang insidente human midangop ang kabanay sa biktima sa estasyon.
Gumikan sa sibyaanan, giaksiyonan ni Konsehal Dave Tumulak, kinsa miadto sa lugar ug ingon man ni City Administrator Floro Casas.
Ang City Hall mohatag ug ayuda sa pamilya aron mahatagan og desenteng lubong ang bata.
Si Tumulak nibutyag sa Superbalita Cebu nga pasumiteron niyag incident report ang CCTO.
Sila si Enrique ug Clarissa walay planong mosang-at og reklamo.
Si Chris Brainer maoy ikaduha sa upat ka mga managsuon.
Ang ilang amahan mitaliwan sa sakit samtang si Clarissa mamaligya og kandila sa Basilica Minore del Sto. Niño. (KFD)