MOTUO mo og sa dili, tuo na lang aron madali. Ang miduso sa certificate of candidacy (COC) pagka presidente 97 kabuok, pagka bise presidente 29, pagka senador 176, ug ang pagka representante sa partylist 270. Mora ra man ni sila og nagkomedya ni sila. Mao ni resulta sa multi-party system sa atong Batakang Balaod.
Daghan ang komentaryo nga ang kandidatora ni Senador Bato Dela Rosa pagka president ug Senador Bong Go pagka bise presidente kutob ra sa Nobembre 15. Nabuko si Senador Bato sa iyang pagduso sa COC sa Oktubre 8, kay ang iyang gisul-ob nga t-shirt green ug dunay marka nga HnP (Hugpong na Pagbabago), ang partido, ni Davao city Mayor Sara Duterte-Carpio.
Daghan ang nagtuo nga pulihan unya si Senador Bato ni Mayor Sara, anak ni Presidente Duterte, ig-abot sa Nobembre 15 o sa di pa moabot ning petsaha kay mao ni panahon nga mahimo pa nga magpulihay ang kandidato, nga kauban sa partido. Mahimo ra gani nga sa di pa ang Nobembre 15, nga mohurar ang mokandidato sa partido aron mahimo nga mopuli.
Dunay lain mga pangagpas nga ang posible nga mag-uban unya sa dayon na sa kampanya mao si Bongbong Marcos (BBM), pagka presidente, ug si Presidente Duterte, pagka bise presidente, tungod kay mahimo ra man nga pulihan ni Presidente Duterte si Senador Go, nga maoy miduso sa COC pagka bise presidente ubos sa PDP-Laban Cusi wing. Hinumdumi nga si Presidente Duterte maoy gipili sa ilang partido nga modagan pagka bise presidente. Si Cusi ra ang nakahibawo sa ilang drama nga si Senador Go ang miduso sa COC pagka bise presidente.
Sa makadaghan higayon, si Presidente Duterte ug Mayor Sara misulti nga usa ra nilang duha ang modagan sa Mayo 9, 2022 nga piliay. Apan daghan ang dili motuo nga dili modagan pagka presidente o bise presidente si Mayor Sara bisan pa sa iyang mga pagbalibad.
Matud sa akong duwende, wa magkasinabot sila si Mayor Sara ug BBM kinsa nila duha ang modagan pagka presidente o bise presidente. Apan kay giunhan man og duso ni BBM si Sara pagka presidente sa iyang COC dunay posibilidad nga magbise siya. Kon di Sara modayon klaro na nga ang iyang amahan ang modagan pagkabise presidente ni BBM.
Dunay dakong problema didto sa Mindanao kon dili modayon og dagan si Mayor Sara pagka presidente tungod kay ang kadaghanan sa mga lokal nga opisyal gikan sa kongresista, gobernador ngadto sa mayor mipirma na og kasabutan ug midagan sila ubos sa HnP ni Mayor Sara. Kining mga lokal nga kandidato sa Mindanao, nga kadaghanan kanila nagpasubli, mora na unya og naputlan og ulo kon di modayon og dagan si Mayor Sara pagka presidente.
Unya si Liloan, Cebu Mayor Ma. Esperenza Christina C. Frasco mobiya na unta nga tigpamaba dinhi sa Cebu ni Mayor Sara. Gawas nga misulti na man si Mayor Sara nga di na siya modayon og dagan pagka presidente, dunay akong nadunggan nga ang iyang inahan, Gob. Gwen Garcia, dili mokwalisyon sa PDP-Laban.