NAPUNO sa hudyaka ang nilabay'ng semana nga onli in the Pilipins lang mahitabo.
Niadtong Oktubre 1-8, gipahigayon sa Comelec ang pag-file sa Certificate of Candidacy (COC) sa mga buot molansad sa eleksiyon sa Mayo 2022. Subay sa katapusang ihap sa maong buhatan, mokabat og 97 ang nilansad pagka-presidente samtang 29 usab sa pagka-bise presidente.
Makatingala gayud nga daghang modagan sa pinakataas nga puwesto luyo niining dakong problema sa pandemya nga gisagubang sa nasud gawas sa kadako sa utang sa Pilipinas nga moabot na'g P11.6 trillion sa Hulyo 2021. Sure gyud mo nga masulbad ninyo ang gumonhap ug problema sa madlang pipol sa Pilipinas sa inyong paglingkod?
Naka-file na sa ilang kandidatura ang halos tanan nga nagpasibaw sa ilang tinguha nga modagan apil na si Vice President Leni Robrero nga maoy manok sa anti-Duterte coalition nga 1Sambayan.
Wala mosalir ang ilang master plan nga mopadagan lamang og usa ka presidente sa oposisyon tungod kay lagi dunay panultion sa English nga sa politika "there is no permanent friend or enemy, only permanent personal or political interest." Wala man tingali kandidato nga naghandom og kaparutan busa halos tanang sa nidagan nituo nga sila ang gibendisyonan sa Labaw'ng Makagagahom nga mosunod kang PRody Duterte.
Apan ang ginahulat gayud sa tanan mao ang pagdagan ni Mayor Sara Duterte nga hangtud sa katapusang gutlo sa Oktubre 8 wa nipatim-aw sa Sofitel Hotel kung diin gipahigayon ang COC filing.
Daw nawad-an og umoy ang sobra 700 ka parallel groups ubos sa Mayor Sara Duterte Alliance ug Sara na All Philippines 2022 apan nadasig gihapon tungod sa posibleng "substitution" karong Nobyembre 15. Subay sa balaod sa eleksiyon, puwedeng mohulip ang usa ka kandidato sa bisan unsang puwesto basta sakop siya sa iyang partido hangtud sa Nobyembre 15.
Para kanako dili pa ulahi ang tanan nga modagan si Mayor Sara pinaagi sa "substitution clause" sa balaod sama sa gibuhat kaniadto sa iyang amahan.
Alang kanako kinahanglang modagan si Mayor Sara tungod niining mga rason. 1) Nag-una kanunay siya sa surbey sa mga "presidentiable." 2) Wala nagkahiusa ang oposisyon. 3) Segurado siya sa suporta sa Visayas ug Mindanao nga matawag nato'g "solid Sara vote". 4) Daghang magbahin sa boto sa Luzon apan dili mawala si Mayor Sara tungod sa "Marcos burial issue" ug sa dagkong BBB projects sa iyang amahan sa Luzon. 4) Bisan kusog ang bira ni BBM, tirahon siya sa isyu sa Martial Law, hidden wealth ug sa isyu sa Benquet Mining batok sa pamilyang Romualdez nga nidapig ni Mayor Sara. 5) Wala maduhig si Mayor Sara sa isyu sa oposisyon ngadto sa iyang amahan, ug sa katapusan, 6) Kinahanglang tabangan niya ang iyang amahan sa kaso niini sa International Criminal Court (ICC).
Sa akong kabahin, karon lang panahona nga sayon ra kaayo daugon sa usa ka Duterte ang eleksiyon tungod kay kung sa sunod eleksiyon pa siya modagan, makaingon ko nga babay na sa tanang Duterte sa politika.
Sa katapusan, gipakita lamang nato sa kalibutan nga buhi ang demokrasya sa atong nasud.