NAGLAUM karon ang Department of Education (DepEd)-Davao nga maapil ang 18 ka mga eskuylahan sa Region 11 nga matugotan nga magpahigayon og face-to-face classes.
Kini human nga duna nay 59 na ka mga tunghaan sa nasud ang magpahigayon og limited nga face-to-face classes nga nakapasar sa assessment sa mga health officials.
Ang 59 ka mga tunghaan subay sa listahan nga gipagula sa DepEd. gikan sa 100 ka mga eskuylahan nga himuong pilot sa pagpahigayon og face-to-face classes nga magsugod Nobyembre 15, 2021 hangtud Enero 31, 2022.
Sa pakighinabi sa Superbalita Davao kang DepEd-Davao spokesperson Jenelito "Dodong" Atillo, gibutyag niini nga unang hugna pa ang 59 nga gipagula sa DepEd ug nanghinaut ang DepEd-Davao nga dunay maapil sa 18 ka mga tunghaan sa Davao Region nga gipailawom sa assessment.
"Ang list nga gi-released last October 5 or 6 was just the initial list. Naa pa’y mogawas nga additional lists hangtud makumpleto ang 100 public schools nga na-shortlist sa DepEd ug Department of Health," ingon ni Atillo sa Superbalita kagahapon sa hapon pinaagi sa Messenger.
Gibutyag sab sa opisyal nga puwede sab maibanan ang 18 ka mga tunghaan ugaling mokalit og taas ang numero sa kaso sa usa ka lugar diin asa naa sa maong dapit ang tunghaan.
"However, tungod kay pabag-o-bag-o ang health classification sa usa ka lugar, naay dakong possibility nga ang na-shortlist usab nato nga 18 for Davao Region basin makuhaan or mobaba ang number. Meaning, automatic nga matanggal sa listahan ang shortlisted schools kung mosaka ang kaso sa lugar diin sila located," pagpasabot ni Atillo.
Gipaklaro sab ni Atillo nga wala pa'y labot sa 18 ang lima ka mga tunghaan nga girekomenda sa lokal nga panggamhanan sa Davao City.
"Davao City schools nga gi-recommend sa LGU, dili pa to sila maapil sa first phase sa pilot implementation sa face-to-face kay wala man sila gud naapil sa unang 18 schools nga dugay nang na-shortlist. Kung makapasar sa validation nga himuon sa DepEd ug DoH lagmit maapil na sa second batch," pagpasabot ni Atillo.
Ang lima ka mga eskuylahan nga girekomenda sa LGU-Davao mao ang Dalagdag National High School, G. Tajo National High School, Saloy National High School, Mabuhay Elementary School ug Gumitan Elementary School.
Gipasalig sa DepEd National nga sa mosunod nga mga adlaw magpagula na sab sila og listahan sa mga tunghaan nga naaprobahan luyo sa makuti nga verification ug assessment sa mga health officials batok sa Covid-19. (Jeepy P. Compio)