COTABATO CITY -- Mag-atubang og kasong adultery ang lalaki ug babayeng sundalo human nga nasakpang nagtariki sa beach resort alas 9:00 sa gabii niadtong Sabado, Oktubre 9, didto sa Parang, Maguindanao Province.
Mga sundalo taguon lang sa ngalan nga si alyas Captain ug alyas Private, pulos mga minyo ug sakop sa Philippine Army sa Armed Forces of the Philippines (AFP).
Sa taho gikan sa Parang Municipal Police Station (MPS), nasayran nga midangop sa ilang buhatan ang bana ni alyas Private nga sundalo sab aron ipadakop ang asawa, kauban ang kulokadidang (kabit) niini nga opisyal sa militar nga si alyas Captain.
Abtik nga milihok ang kapulisan sa Parang MPS uban ang bana ni alyas Private ug gironda ang cottage sa usa ka beach resort sa nahisgutang lungsod.
Naaktuhan gyud sa mga pulis nga nagpatong si Captain sa babaye nga sundalo nga pulos walay mga sapot.
Buot pa unta nga moiktad si alyas Captain nga walay purol apan napalibutan na siya sa mga pulis.
Pulos minyo ang mga nahisgutang sundalo ug naa nay mga anak apan natental sa lawasnong himaya.
Desidido gyud ang bana ni alyas Private nga mopasaka og kasong criminal ug administratibo batok sa iyang asawa ug sa opisyal sa militar aron matud pa mataktak sa serbisyo.
Sa kasamtangan, ang mga suspek gibalhog sa costudial facility sa Parang MPS sa nahisgutang probinsiya.