KINAHANGLANG nakakompleto na og bakuna batok sa Covid-19 ang mga import nga mopakita’g aksyon sa 2nd conference sa Philippine Basketball Association (PBA) nga gibanabanang mapahigayon sa tungatungang bahin karong Nobiyembre, 2021.
Mao kini ang gikasabutan sa kadagkuan sa PBA human sila nakadesisyon nga ibalik na ang pagpahigayon sa import-laden conference.
Sa miaging season, bugtong ang Philippine Cup o All-Filipino conference lang ang napahigayon sa PBA gumikan sa kahasol nga hatod sa Covod-19.
Ang PBA nisugod na sa pagpakigsabot sa national ug local governments kabahin ning ilahang plano.
Gawas sa lagda kabahin sa fully vaccination, ang mga import limitahan lang og 6’6” nga gitas-on.
Niini, gilaumang makaduwa og balik ang beteranong imports sa liga sama nila ni Justin Brownlee, Allen Durham, Eugene Phelps, KJ McDaniels, ug uban pa.
Ang Brgy. Ginebra Gin Kings maoy katapusang nakalangkat og korona sa import-laden conference sa pagpangulo ni Brownlee sa wala pa nikuyanap ang Covid-19.
Sa laing bahin, nag-ung-ong na sa pultahan sa finals sa 2021 Philippine Cup ang Magnolia Ang Pambansang Manok Hotshots human nila gipangmakmak ang Meralco Bolts, 81-69, sa Game 4 sa ilang semis series niadtong Dominggo, Oktubre 10, 2021 sa Don Honorio Ventura State University Gym sa Bacolor, Pampanga.
Ang kadaugan naghatag sa Hotshots og 3-1 nga bintaha sa best-of-seven nga engkuwentro.
Ang kadaugan gipangulohan nila ni Ian Sangalang, Mark Barroca ug Calvin Abueva pinaagi sa ilang 17 puntos matag usa.
Puntos matag usa:
Magnolia (81) - Sangalang 17, Abueva 17, Barroca 17, Jalalon 10, Lee 9, Ahanmisi 5, Dionisio 4, Corpuz 1, Reavis 1.
Meralco (69) - Hugnatan 21, Hodge 13, Newsome 11, Quinto 7, Pinto 6, Belo 3, Pasaol 3, Baclao 3, Maliksi 2. (ESL)