ANAA na sa 19,830 ang kinatibuk-ang mga kaso sa coronavirus disease (Covid-19) sa Cagayan de Oro human miubos ang ihap sa mga bag-ong kaso sa maong syudad.

Nakatala and Cagayan de Oro og 31 ka mga kaso sulod sa duha ka adlaw, pulos mga local transmissions.

Sumala sa report sa City Health Office, sa 31 ka mga bag-ong lokal nga mga kaso, 18 ang mga local index nga mga kaso, walo ang mga close contacts sa mga pasyenteng nagpositibo sa coronavirus, usa ang local authorized persons outside residence (Apor), usa ang Apor with link, ug tulo ang mga patay.

Ang ihap sa mga aktibo nga kaso sa Cagayan de Oro miubos na sad, aduna na kaorn sa 1,548.

Sa maong numero, 451 niini na-admit sa Northern Mindanao Medical Center ug uban pang mga ospital sa syudad, 1,097 ang mga outpatients, ug upat ang mga ROFs/LSIs.

Nakatala usab og 81 ka mga Covid-positive nga mga kaso nga karon naka-recover. Anaa na karon sa 17,449 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 833.