SI Davao City Mayor Sara Duterte nakahukom nga di na siya moapil pa sa presidential race, inay iyang humanon ang iyang katapusang termino pagka mayor sa siyudad. Bisan ang iyang amahan, Presidente Rodrigo Duterte, niingon nga ang iyang anak hugot na sa iyang hukom sa di pagdagan.
Si Sara nangayo na og pasaylo sa iyang mga supporter nga nasagmuyo sa iyang hukom.
Ang Presidente niingon nga daghan pay mahimo ang mayor kay bata pa kini. Daghan pa ang makab-ot niini alang sa public service.
Nakakita usab tingali si Sara nga bisan no. 1 siya sa survey, dunay duha ka mga hitabo nga posibleng makaapekto sa iyang kandidatura. Una, ang isyu sa Pharmally nga giatubang sa iyang amahan hayan sakyan sa ilang mga kaatbang.
Dako kini nga isyu batok sa administrasyon nga padayon pang gituki sa mga senador kalabot sa pagasto sa kagamhanan sa pundo alang sa Covid-19. Bisan tuod kon wa mamatud-i nga dunay nakabulsa nga opisyal sa kagamhanan kalabot sa transaksyon, apan sa dagan sa imbestigasyon nanurok ang mga pagduda nga dunay anomaliya.
Nisaad si Senador Richard Gordon nga iyang susihon og maayo kini nga transaksyon aron pagsuta kon duna bay anomaliya.
Lain usab nga posibleng makaapekto sa kahigayunan sa pagdaog sa mayor mao ang pagpapili ni Senador Manny Pacquiao. Mosugot sila o di, ang kandidatura ni Pacquaio dako og epekto sa botos ni Sara nga makuha gikan sa Mindanao ug Kabisay-an. Mabahin na man unya ang suporta ug botos. Lahi sa pagdagan sa iyang amahan kay klaro man nga siya ra sa Mindanao ug Bisaya pa. Busa nakuha ang Kabisay-an ug Mindanao.
Angay nang mag move on ang mga supporter sa presidential daughter. Duna pay igong panahon si Sara kay batan-on pa. Iya usab nga mapamatud-an ngadto sa katawhan nga wa siya magpuyo ug magsunod sa anino sa iyang amahan. Mapakita niyang makabarog siya sa iyang kaugalingon nga ngalan. Mao ni ang usa sa mga mithi sa maayong lider.