ANG Emergency Operations Center misirado na sa pito ka barangay isolation centers (BIC) samtang lima na lang gikan sa walo ka akreditado nga hotel ang gihimong isolation facility sa mga nagpositibo sa Covid-19, Oktubre 11, 2021.
Sa 10 ka mga BIC sa Cebu City, ang Zapatera, Banilad ug Mega Stay-in ang nagpabiling abli alang sa mga asymptomatic Covid-19 positive sanglit ang Guadalupe, City Central, Mabolo, Labangon, San Nicolas ug Don Sergio temporaryong gitak-upan tungod kay nangaayo na ang tanang gipangsulod niini.
Samtang wa na say mga asymptomatic Covid-19 positive sa Sampaguita Suites ug Griffin Hotel.
Ang Travel Bee Fuente, Travel Bee Capitol, Cebu Grand Hotel, Hotel Pier Cuatro ug In & Go nalang ang adunay mga nag-okupar apan dili tanan kanila taga Cebu City sanglit adunay taga laing local government unit nga nag-isolate sa maong mga pasilidad.
Gipahibawo usab ni Konsehal Joel Garganera, deputy chief implementer sa EOC nga 28 porsyento nalang ang criticial care occupancy rate sa 15 ka pribado ug publikong hospital sa Cebu City samtang 10% nalang ang anaa sa kustodiya sa Cebu City Quarantine Center.
Gihangop ni Garganera ang pagkunhod sa critical care utilization rate sa mga hospital sanglit makapahuway usab ang mga medical frontliners diin niadtong Agusto, niabot og 80 porsyento ang occupancy rate sa mga tambalanan,
Sa kinatibuk-an, ang Cebu City nakabakuna na og 319,296 ka mga tawo nga fully-vaccinates gikan sa 738, 353 ka mga tawo nga nagparehistro sa Pabakunata.com.