NAGTAKILID nang nagbarog ang rebulto ni Sr. Sto. Niño nga nahiluna sa Holy Door sa the National Shrine of St. Joseph tungod sa nabuak nga tiil niini human gilabay og dakong bato sa usa ka lalake alas 7:30 sa buntag sa Lunes, Oktubre 11.
Giila ang suspek nga si Randy Laguna Bandilao, 33, taga Zone Luy-a, Barangay Paknaan, Mandaue City.
Nahunong ang misa sa alas 7:00 sa buntag tungod sa hitabo, sigon ni Herbert Pabroa, maintenance personnel sa simbahan.
Matod ni Pabroa nga samtang nagsugod ang misa, nikalit lang pagsiyagit si Bandilao ug gihubo ang t-shirt niini aron hapakon ang mga vase nga halad alang sa imahen sa Mother of Perpetual Help hinungdan nga nabuak ug nagpasad sa salog ang mga tipaka.
Nagdala sab kini og dakong bato ug gilabay niya ang urna sa rebulto sa Santo Niño hinungdan nga nabuak ang bildo ug nabuak sab ang tiil sa rebulto ug ubang adurno sa tumbanan sa rebulto.
Gilangkat sab ni Bandilao ang gipapilit nga mga adurno sulod sa Holy Door.
Matod ni Pabroa nga samtang gibuhat kini ni Pabroa, nagsige sab siya og siyagit og “Pasayloa ko, Ginuo!”
Human niini, nagdali pagdagan si Bandilao pagawas sa simbahan ug nisuway pagkatkat sa paril.
Apan di kini niya maabot tungod sa katas-on hinungdan nga nidagan sa pikas nga mga gate.
Apan, gimandoan na ang mga security guard sa simbahan nga sirad-an ang mga gate tungod kay paingon na ang kapulisan sa Centro Police Station.
Sa laing pakighinabi, niingon si Police Lt. Col. Eloveo Marquez, deputy city director for operations, nga gialarmahan dayon nila ang panghitabo ug gisikop si Bandilao.
Kasamtangang, gibilanggo si Bandilao sa Centro Police Station. (KFD)