NAKADAWAT og mga grocery ang 100 ka mga nagpabakuna pinaagi sa gihimong raffle draw samtang nagpadayon ang vaccination rollout sa Mapalad Gym, Barangay Catalunan Pequeño, Davao City, Oktubre 11, 2021.
Halos 500 ka mga indibiduwal ang nagpabakuna diin naapil sila sa raffle, apan 100 lang kanila ang palarang mananaug.
Sumala sa mga residente nga samtang naghulat nalingaw sab sila sa pa-raffle diin nahimong ka-partner si Konsehal Bonifacio Militar ug ang lokal nga kagamhanan sa Davao City.
Sa laing bahin, una na sab nga nalipay ang daghang mga nagpabakuna sa "Bakuna Nights" sa Davao City kay nagpahigayon sab kini og raffle draw.
Nagpahibalo sab ang LGU-Davao sa tanang Dabawenyo nga edad 18 pataas nga wala pa kapabakuna og anti-Covid 19 vaccine, mamahimong moadto lang sa People's Park nga nagsugod kagahapon alang sa first dose ug second dose vaccine diin dunay mga available vaccine nga Sinovac, Sinopharm, Moderna ug Pfizer. (Jeepy P. Compio)