ANGKUNON og suway sa Magnolia Ang Pambansang Manok Hotshots ang unang lingkuranan sa finals sa ilang pagpakigbatok og balik sa Meralco Bolts karong alas 3:00 sa hapon sa Game 5 sa ilang semi-finals best-of-seven series sa Philippine Basketball Association (PBA) 2021 Philippine Cup sa Bacolor, Pampanga.
Taliwala sa dako nilang labaw, 3-1, sa series, ang Hotshots ningpadayag nga ipagawas nila ang tanan nilang ikabuga aron humanon og sayo kining maong misyon.
Ang beteranong pointguard sa Hotshots nga si Mark Barroca miingon nga dili nila hatagan og gamay nga lugway ang Bolts.
Matod ni Barroca nga kon mahimo pang doblihon ang ilang paningkamot sa ilang dakong kadaugan sa Game 4, 81-69, ilaha kining himuon gumikan kay sayod siyang delikado kon makakita pa og kahayag ang Bolts.
“Based on my experience, mahirap mag-close ng series, sobrang mahirap,” matod ni Barroca nga napatik sa PBA.PH.
“So kung ano ‘yung effort na ibinigay namin (in Game 4) kailangan pa naming i-triple para makuha. Kasi hindi ibibigay iyan eh. Kung kami nasa sit’wasyon nila, back-to-the-wall, iyun talaga gagawin namin.”
Sa kasaysayan sa PBA, 52 sa 56 ka teams nga nakaposte og 3-1 nga bintaha sa best-of-seven series mao ang minglampos.
Sa laing bahin, buakon sa San Miguel Beermen ug TNT Tropang Giga ang ilang 2-2 nga panagtabla sa ilang panagsangka sa Game 5 sa kaugalingon nilang semi-final series karong alas 6:00 sa gabii.
Ning maong series, wala’y makonsiderar nga inilog apan ning higayuna, tataw nga nakapabor og gamay ang Beermen gumikan kay kuwestiyunableng makaduwa ang usa sa ilang mga pambato nga si Poy Erram, kinsa naangol (fractured cheekbone) sa Game 4.
Kon makaduwa man gani si Erram, labing seguro dili sab 100 percent ang mahatag niini. (ESL)