SA tantong dalidali nga makakwarta, naintonses na hinuon sila.
Mao kini ang nahitabo sa pipila ka mga Bol-anon nga na-repa (nailad) sa gitawag og REPA.
Matod pa sa balita, miabot na sa P330 milyunes ang claims nga nahimoan na og affidavit batok sa mga tawo nga nagpadagan sa investment scheme nga gitawag og REPA.
Nahimo kini human mireklamo ang mga investors nga wala na nila makuha ang angay unta nila nga madawat gikan sa ilang kwarta nga gipuhunan sa maong “negosyo.”
Tiaw bay kapila pil-a ang kwarta nga ilang madawat matag bulan isip “ganansiya” gikan sa ilang gi-invest nga kwarta.
Usa kini ka klase sa negosyo nga “too good to be true,” matod pa.
Kay naghisgot man og plano nga kasohan ang nagpatigayon sa maong REPA, aduna akoy mga pangutana.
Duna bay nailad? Nailad ba ang mga tawo nga mipundo sa ilang puhunan sa kasabotan nga aduna silay madawat nga “ganansiya’’ matag bulan nga hasta kapila pil-a sa kantidad nga madawat kon i-deposito lang ang maong kantidad sa banko?
Kon aduna man gani pangilad, kanus-a magsugod ang pangilad?
Atong suwayan og tubag.
Sa panahon nga nagsabot pa sila sa maong transaksiyon, espeso kaayo ang pasalig nga madawat nila ang gikasabotan nga ‘ganansiya’ matag bulan. Tuod man, nadawat gyod nila ang kantidad nga gikasabotan.
Hilabihang lipaya sa investor. Tinuod gyod diay ang gisaad nga madawat ang gikasabotan nga kantidad. Pagka-sunod bulan, og sa miabot pa nga mga bulan, nadawat gyod nila ang gikasabotang kantidad.
Dako na kaayo sila og pangandoy sa kinabuhi. Nakita nila nga sama kini sa “manna from heaven.” Na-usa na dayon ang diha sa ilang hunahuna, ma-dato na gyod ko aning paagiha.
Sa pagtuo nga maayo kaayo ang maong negosyo, ug wala sila masayop sa ilang gibuhat, gidugangan pa nila ang ilang puhunan sa pagtuo nga mas dako pa gyod ang ilang madawat matag bulan. Ilang gi-roll-over ang ilang kapital aron mas modako kini.
Apan sa kalit lang, naundang kini og wala na nila madawat ang sagad nilang madawat nga kantidad.
Kon atong subayon, sa mga panahon nga nadawat pa nila ang kantidad nga ilang gikasabotan, klaro nga walay pangilad nga nahitabo. Nagsugod lang kini sa dihang naundang ang ilang pagdawat matag bulan.