SUPERBALITA CEBU

235 ka pamilya sa Talisay City apektado sa dagkong bawod

■ MISUSI. Si Poblacion, Talisay Barangay Captain Edward Alesna misusi sa mga balay sa baybayon nga nangaguba sa dagkong mga bawod sa Martes sa buntag, Oktubre 12, 2021. / TAMPO SA BARANGAY POBLACION

LABING 235 ka mga pamilya kun 815 ka mga lumolupyo sa lima ka mga barangay sa Dakbayan sa Talisay ang apektado sa dagkong mga bawod nga nihapak sa kabalayan duol sa baybayon sa Martes sa tungang gabii, Oktubre 12, 2021 nga dala sa hangin nga habagat ug taub.

Si Felipa Solana, pangu sa Talisay City Social Welfare Office, niingon nga sa ilang pakisusi, ang apektadong mga lumolupyo nagagikan sa Barangay Poblacion, Dumlog. Tanke, San Roque ug Cansojong.

Sa Poblacion, 62 ka mga pamilya o 281 ka mga lumolupyo ang apektado sa paghapak sa dagkong mga bawod.

Siyam ka mga balay ang hingpit nga nangaguba samtang 59 ang partial nga nakaangkon og kadaut.

Usa ka bangka nga panagatan ang naguba samtang duha usab ang partial.

Sa Barangay Dumlog, 100 ka mga pamilya kun 340 ka mga lumolupyo ang apektado.

Usa ka balay ang hingpit nga naguba samtang 28 ang nakaangkon og kadaut.

Usa usab ka bangka nga panagatan ang hingpit nga naguba.

Sa Tanke, 26 ka mga pamilya o 115 ka mga lumolupyo ang apektado. Way balay nga nadaut, apan upat ka bangka nga panagatan ang hingpit nga nangadaut.

Tulo usab ka mga pamilya kun 15 ka mga lumolupyo ang naapektuhan sa bawod sa San Roque. Usa ka fishing boat ang hingpit nga naguba.

Ikaduhang labing apektado mao ang Barangay Cansojong, diin 44 ka mga pamilya kun 194 ka mga tawo ang naapektuhan.

Matod ni Solana nga ilang pasiunang gihatag sa mga lumolupyo mao ang lugaw, apan si Mayor Gerald Anthony “Samsam” Gullas nimando sa CSWS sa pagsusi kon unsay mga panginahanglan sa apektadong mga pamilya.

Gitataw usab ni Gullas sa interbyu sa GMA 7 Balitang Bisdak nga duna nay budget alang sa seawall aron di na magbalikbalik ang suliran nga kada tuig mahitabo na kon mokusog ang Habagat.

Laing mga barangay nga apektado mao ang Tanke, Cansojong ug San Roque, pulos usab mga coastal barangay.

Si Poblacion Barangay Kapitan Edward Alesna niingon nga ila nang giandam ang barangay gym.

Apan ang mga lumolupyo di gustong mamakwit kay adto lang sila sa ilang mga kabanay nga naa lang sa duol namuyo, apan wa maabot sa tubig.

Matod ni Talisay City Disaster Risk Reduction and Management Office (CDDRMO) head Alvin Santillana nga gikinahanglan nga pabakwiton ang apektadong mga pamilya.

“Coastal surge lang siya that added to the height of the high tide mao na naabot gyud didto sa kabalayan ang iyang dagat. Now the best thing to do didto, they will just evacuate to the higher grounds,” nagkanayon si Santillana sa samang interbyu. (REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph