KAPIN sa 2,000 ka mga trabahante sa shipyard sa Barangay Tayud, Lungsod sa Consolacion, Sugbo ang mohangyo ngadto ni Presidente Rodrigo Duterte nga ipahunong ang reclamation project sa ilang lugar.
Sa higayon nga hingpit nga maabunohan ang maong dapit mawad-an sila og panginabuhi-an nga mao ray ilang gisaligan.
Ang petition letter diin adunay pirma sa mga apektadong trabahante nanawagan nga dili ipadayon ang maong reclamation project tungod kay dili lang sila ang grabeng maapektuhan apan lakip na ang ilang pamilya.
Mopadala sab sila og kopya sa maong petition letter ngadto sa hingtungdang ahensiya sa kagamhanan lakip na ang Department of Environment and Natural Resources (DENR), Philippine Reclamation Authority (PRA), Department of Labor and Employment (Dole) ingon man sa Lungsod sa Consolacion.
Ang municipal government sa Consolacion ang nagtinguha sa pagpahigayon sa Seafront City Project nga adunay gilapdon sa 235 ka ektarya alang sa mixed-used project nga gipanglantawan nga mamahimo unyang international economic hub.
Ang lokal nga kagamhanan nga gipangulohan ni Bise Mayor Teresa Alegado ang nihimo na sa mga preparasyon aron sa pagkuha og mga gikinahanglang permit aron nga kasugdan na ang maong reclamation project.
Si Police Chief Master Sargent Edmon Melendres, usa sa mga lumolopyo sa Tayud, ang nipadayag sa pag-uyon nga ma-reclaim ang maong lugar alang sa kaluwasan sa panglawas sa mga residente ingon man sa kina-iyahan.
“Naa pa mag-sandblasting pwerte aboga. Ang ila mga used oil ipanglabay lang sa dagat hugaw naa kaau na amoa baybayon,” tipik sa reklamo ni Melendres nga mao say reklamo sa mga namuyo duol sa area. (FVQ, PR)