COTABATO CITY -- Pasakaan og tukmang kaso ang duha ka mga sundalo, usa ka pulis ug lain pang duha ka mga sibilyan nga kakunsabo sa pagpamaligya og mga armas ug bala nga nadakpan alas 9:25 sa buntag, Martes.
Mga suspek giila nga sila Police Sergeant Elever Jay Anggot Soverano nga sakop sa Regional Crime Laboratory Office sa Bangsamoro Autonomous Region in Muslim Mindanao (Barmm), Sergeant Gleen Argones Sangyao, nagpuyo sa Barangay Poblacion Lebak, Sultan Kudarat, Corporal Reynaldo II Dechavez Dichosa, molupyo sa President Quirino, Sultan Kudarat, kinsa pulos mga sakop sa Philippine Army.
Dakpan sab ang magsuon nga sibilyan nga sila Datu Morjan Kunakon Tumindig ug Adams Tumindig, pulos nagpuyo sa Barangay Tamontaka, Datu Odin Sinsuat, Maguindanao Province nga giingong kakunsabo sa modus operandi.
Gibutyag ni Datu Odin Sinsuat Chief of Police Lieutenant Colonel Rommel Dela Vega nga nagpahigayon sila og entrapment operation sa balay sa magsuon nga Tumindig sa Barangay Tamontaka sa pakig-alayon sa militar.
Narekober sa raiding team gikan sa posisyon sa mga suspek ang mga tag-as nga matang sa armas nga gilangkuban sa usa ka 5.56 mm Bushmaster rifle, usa ka 5.56 AFP Property rifle, usa ka M4 Carbine, usa ka cal .45 Rock island, 1 cal .45 Colt, usa ka Glock 17 Gen 4 PNP property, usa ka Glock 17 Gen 4 AFP property, usa ka ZIGANA PX-9 cal. 9mm pistol PNP property, mga bala, magazines cellphones, P500,000 boodle money ug mga identifications cards sa mga suspek. (Edgar E. Fuerzas)