PADAYON ang gihimong imbestigasyon sa kapulisan sa Tagum City kon mapanubag ba ang Department of Public Works and Highways (DPWH)-Davao Region sa natigayong pagkahulog sa usa ka sakyanan sa nagpadayong road construction sa Purok 1-A, Barangay Magdum, Tagum City.
Kini human usa ka pribadong sakyanan ang nahulog ala 1:10 sa kaadlawon, Martes, Oktubre 12, 2021, sa dapit diin asa gipahigayon ang pag-repair sa tulay nga nagkutay sa kalsada.
Gisuta karon sa kapulisan kon naa bay mga early warning devices nga gibutang aron masayran sa mga motorista ang kahimtang sa kalsada dihang layo pa ang sakyanan.
Una niini, usa ka Senior Fire Officer (SFO) 1 Dennis Donesa, 53, taga Bucana, Davao City, ug sakop sa Bureau of Fire Protection, ang nahulog samtang iyang gimaneho nga sports utility vehicle gikan sa Tagum City proper padulong sa Mawab, Davao de Oro.
Giingong walay mga early warning devices ang gibutang sa dapit suma sa mga motorista hinungdan nga natigayon ang disgrasya.
Anaa sa ospital si Donesa tungod sa mga minor injuries nga nahiaguman niini kinsa anaa na sa luwas nga kahimtang. (Jeepy P. Compio)