GIDEKLARA sa Securities and Exchange Commission (SEC) Miyerkules, Oktubre 13, 2021, nga ang Repa (Repa Paluwagan) isip "Ponzi scheme" ug "does not appear as a registered corporation or partnership."
Gipagawas sa SEC ang pamahayag human makadawat og mga taho ug pangutana gikan sa publiko kon ang operasyon sa Repa sa Bohol, Davao, Bukidnon ug Cebu narehistro sa komisyon ug kon makapangayo ba og puhonan gikan sa katawhan.
Matud sa komisyon nga base sa mga taho, mga tawo nga nagpaluyo sa maong laraw nagpaaron-ingnon isip "administrators" (admins) ug "sellers," makigsabot sa ilang biktima pinaagi sa pagkontak kanila agi sa Facebook, Messenger o uban pang chat groups ug personal nga transaksiyon ug maghanyag kanila og "limited slots" alang sa investment packages kon diin ang usa pwedeng mobubo og P50,000 ug saaran nga mointeres kini og P20,000 o equivalent sa 40 porsiyento nga interest rate sa hamubo nga panahon - duha ka semana.
Giklaro pa nga ang kita nga natigum sa kompaniya wa magagikan sa lehitimong tinubdan sa negusyo apan gikan lang sa mga puhonan nga gibayad sa ilang kasamtangang investors ug sa mga bag-o nilang narekrut nga mga miyembro.
"These false representations of lucrative return of investment within a short period of time from apparently legitimate sources effectively lures the public to invest their hard-earned money to their company," puno pa sa komisyon.
Tungod niini, ang ahensiya nagtambag sa publiko nga di mobubo og puhonan o moundang na sa pagbubo og puhonan sa bisan unsang paagi nga ihanyag sa Repa nga way rehistrasyon gikan sa komisyon.
Mga administrador ug mga tawo nga nagpaluyo sa operasyon sa maong institusyon mahimong mag-atubang og kasong kriminal ug makamulta og maximum fine nga P5 milyon o silot nga 21 anyos nga pagkapriso o duha subay sa Sections 28 ug 73 sa Securities Regulation Code (SRC).
Gibutyag sab ni Davao City Anti-Scam Unit (ASU) chief Simplicio Sagarino sa paghinabi sa radyo nga moabot na og 80 ka tawo ang nagreklamo batok sa Repa niadtong Martes, kinsa nagpasaka og kaso batok sa mga administrators tungod sa pagkawkaw sa ilang puhonan.
Gisulti ni Sagarino ngadto sa SunStar Davao bag-ohay lang nga gani uban sa nagreklamo nakabubo na og P11 milyon.